Header Ads

ມະຫາວິທະຍາໄລແຫ່ງຊາດ(ມຊ) ເຕືອນ​ຊ່ວງນີ້ໃຫ້ລະວັງກຸ່ມ​ຄົນ​ບໍ່ດີ​ຫລອກ​ເອົາ​ເງີ​ນດ້ວຍການແອບ​ອ້າງ​ແລ່ນ​​ເຂົ້າຮຽນຕໍ່



ປັດຈຸ​ບັນ​ການ​ສອບ​ເສັງ​ຈົບຊັ້ນມໍປາຍໃນທົ່ວ​ປະ​ເທດ​ໄດ້​ສໍາເລັດ​ລົງແລ້ວ, ຊຶ່ງ​ບັນດາ​ນັກຮຽນ, ນັກ​ສຶກສາ ຕ່າງ​ກໍ​ກຽມຈິດ​ກຽມ​ໃຈ​ເອົາ​ໃຈ​ໃສ່​ໃນ​ການ​ຄົ້ນ​ຄ້ວາ​ບົດຮຽນ ​ເພື່ອ​ກຽມສອບ​ເສັງ​ເຂົ້າມະຫາວິທະຍາ​ໄລ ​ແລະ ສະ​ຖາ​ບັນ​ການ​ສຶກສາ​ຕ່າງໆ ແລະ ຄືດັ່ງທຸກປີຜ່ານມາພໍຮອດໄລຍະກະກຽມສອບເສັງເຂົ້າຮຽນໃນລະດັບສູງ ຫລື ອາຊີວະ, ຈຶ່ງມັກ​ມີ​ກຸ່ມ​ຄົນ​ບໍ່ດີ​ສວຍ​ໂອກາດ​ແອບ​ອ້າງວ່າ​ສາມາດ​ແລ່ນ​ເອົາ​ເຂົ້າຮຽນ​ໃນ​ມະຫາວິທະຍາ​ໄລ​ຂອງລັດ, ໂດຍ​ສະ​ເພາະ​ແມ່ນ​ມະຫາວິທະຍາ​ໄລ​ແຫ່ງ​ຊາດ, ຊຶ່ງ​ເປັນ​ສະ​ຖາ​ບັນ​ການ​ສຶກສາ​ທີ່ມີຊື່ສຽງ​ຂອງປະເທດ ແລະ ຜ່ານມາກໍເຄີຍມີຜູ້ຕົກເປັນເຫຍື່ອຂອງກຸ່ມຄົນດັ່ງກ່າວມາແລ້ວນັບບໍ່ຖ້ວນ.

ທ່ານ ຄຳ​ຜົງ ນາມມະ​ວົງ​ມີ​ໄຊ ຫົວໜ້າຫ້ອງການວິຊາ​ການມະຫາວິທະຍາ​ໄລ​ແຫ່ງ​ຊາດ ​ໄດ້​​ໃຫ້​ຮູ້​ວ່າ: ປັດຈຸບັນໄດ້ມີ​ກຸ່ມ​ຄົນ​ບໍ່ດີ​ຈຳນວນໜຶ່ງ​ເຄື່ອນ​ໄຫວຕົວະ​ຍົວະຫລອກ​ລວງ​ຜູ້ປົກຄອງ, ກໍຄືພໍ່​ແມ່ນັກ​ສຶກສາວ່າສາມາດ​​ວິ່ງ​ເຕັ້ນແລ່ນ​ເອົາ​ລູກ​ຫລານ​​ເຂົ້າຮຽນຢູ່ມະຫາວິທະຍາ​ໄລ​ແຫ່ງ​ຊາດ, ​ໂດຍ​​ນັກ​ສຶກສາບໍ່ຕ້ອງຜ່ານ​ການ​ສອບ​ເສັງ ຫລື ​ເສັງ​ບໍ່ຜ່ານ​ກໍ​ສາມາດປອມ​ແປງ​ລາຍ​ຊື່​ໃຫ້​ເຂົ້າຮຽນ​ໄດ້, ​ເຊິ່ງ​ໃນ​ປີຜ່ານມາທາງ​ມະຫາວິທະຍາ​ໄລ​ແຫ່ງ​ຊາດ​ໄດ້​ພົບ​ເຫັນ​ 2 ກໍລະນີທີ່​ນັກ​ສຶກສາ​ໄດ້​ປອມ​ແປງ​ເອກະສານ ເປັນຕົ້ນ: ​ໃບ​ປະກາດ​ຈົບ​ຊັ້ນ ມໍປາຍ ​ແລະ ​ລາຍ​ຊື່​ສອບ​ເສັງ ແລະ ໄດ້ຮຽກ​ນັກ​ສຶກສາທີ່ກະທໍາຜິດດັ່ງກ່າວ​ມາ​ສອບ​ສວນ ​ແລະ ຜູ້​ປົກຄອງກໍ​ຮັບ​ສາລະພາບ​ວ່າ​ໄດ້​ປອມ​ແປງ​ເອກະສານແທ້, ​ໂດຍ​ມີ​ກຸ່ມຄົນຈໍານວນໜຶ່ງຜູ້ດໍາເນີນການໃຫ້ທັງໝົດ,​ ​ເຊິ່ງທາງມະຫາວິທະຍາ​ໄລ​ແຫ່ງ​ຊາດກໍ​ໄດ້​ຕັດ​ສິດ​ນັກ​ສຶກສາທັງ​ສອງ​ຄົນ, ພ້ອມ​​ສົ່ງ​ຕົວ​ໃຫ້​ເຈົ້າໜ້າທີ່​ດຳ​ເນີນ​ຄະດີ​ຕາມ​ລະບຽບກົດໝາຍ.



ທີ່ມາຫນັງສືພິມລາວພັດທະນາ 
© ໂຕະນໍ້າຊາ | tonamcha.com  

___________


Powered by Blogger.