ລັດຖະມົນຕີກະຊວງການຕ່າງປະເທດລາວ ຕ້ອນຮັບ ລັດຖະມົນຕີກະຊວງການຄ້າ ອາເມລິກາ
ໃນຕອນເຊົ້າຂອງວັນທີ 29 ກັນຍາ 2017, ຢູ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Wilbur Ross, ລັດຖະມົນຕີກະຊວງການຄ້າ ແຫ່ງ ສະຫະລັດ ອາເມລິກາ ໃນໂອກາດເດີນທາງມາເຄື່ອນໄຫວຢ້ຽມຢາມ ສປປ ລາວ, ໃນລະຫວ່າງວັນທີ 28-30 ກັນຍາ 2017.
ໃນໂອກາດດັ່ງກ່າວນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຄັ້ງທຳອິດຂອງລັດຖະມົນຕີກະຊວງການຄ້າຂອງສະຫະລັດ ອາເມລິກາ, ຊຶ່ງເປັນໂອກາດທີ່ສຳຄັນໃນການປຶກສາຫາລືເພື່ອເພີ້ມທະວີການພົວພັນສອງຝ່າຍ ໃນດ້ານການຄ້າ ແລະ ການລົງທຶນ ໃນຕໍ່ໜ້າ, ພ້ອມທັງໄດ້ສະແດງຄວາມຍິນດີຕໍ່ການເຊັນສັນຍາລະຫວ່າງ ບໍລິສັດ Convalt-GE Energy ຂອງອາເມລິກາ ກັບທະນາຄານ Cathay United Bank ເພື່ອພັດທະນາໂຄງການພະລັງງານແສງຕາເວັນຢູ່ພາກໃຕ້ຂອງລາວ ແລະ ການເຊັນບົດບັນທຶກຄວາມເຂົ້າໃຈວ່າດ້ວຍ ການສ້າງຕັ້ງສູນສົ່ງເສີີມນັກທຸລະກິດເພດຍິງ (Women’s Entrepreneurial Center) ຊຶ່ງຈະເປັນການປະກອບສ່ວນອັນສໍາຄັນໃນການເສີມຂະຫຍາຍການພົວພັນຮ່ວມມືສອງຝ່າຍ ກໍຄື ໃຫ້ແກ່ການພັດທະນາເສດຖະກິດຂອງ ສປປ ລາວ. ພ້ອມກັນນັ້ນ, ທ່ານລັດຖະມົນຕີ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈໄປຍັງລັດຖະບານສະຫະລັດ ອາເມລິກາ ທີ່ໄດ້ໃຫ້ການຮ່ວມມືຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະວຽກງານເກັບກູ້ລູກລະເບີດທີ່ຍັງບໍ່ທັນແຕກ, ການສຶກສາ, ສາທາລະນະສຸກ, ການຄວບຄຸມ ແລະ ປາບປາມຢາເສບຕິດ ກໍຄື ໃນດ້ານການບັງຄັບໃຊ້ກົດໝາຍ ແລະ ອື່ນໆ.
ຜ່ານມາ, ທັງສອງຝ່າຍໄດ້ມີການເພີ້ມທະວີການແລກປ່ຽນການຢ້ຽມຢາມຂອງຄະນະຜູ້ແທນ ໃນຂະແໜງ ເສດຖະກິດ ແລະ ການຄ້າ-ການລົງທຶນ, ຊຶ່ງຫຼ້າສຸດ ຄະນະຜູ້ແທນສະພາທຸລະກິດອາຊຽນ-ອາເມລິກາ (US-Asean Business Council) ໄດ້ເດີນທາງມາຢ້ຽມຢາມ ເພື່ອສຶກສາເບິ່ງຄວາມອາດສາມາດໃນການລົງທຶນຢູ່ລາວໃຫ້ຫຼາຍຂຶ້ນ.
ທີ່ມາ: ກະຊວງການຕ່າງປະເທດ
© ໂຕະນໍ້າຊາ | tonamcha.com
___________
Post a Comment