ປະທານປະເທດຢ້ຽມຢາມ ແລະ ພົບປະປະຊາຊົນ 2 ບ້ານທຸກຍາກຢູ່ແຂວງສະຫວັນນະເຂດ

ໃນວັນທີ 27 ພຶດສະພາ 2018 ຜ່ານມາ, ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວພ້ອມຄະນະລົງຢ້ຽມຢາມ ແລະ ພົບປະພໍ່ແມ່ປະຊາຊົນຜູ້ທຸກຍາກ 27 ຄອບຄົວຢູ່ ບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ໂດຍໃຫ້ຕ້ອນຮັບຂອງ ທ່ານ ເກຍ ອູ໊ສິດທິເດດ ນັກທຸລະກິດຜູ້ໃຈເມດຕາ, ການນໍາເມືອງ ແລະ ພໍ່ແມ່ປະຊາຊົນຢູ່ບ້ານດັ່ງກ່າວ.

ທ່ານ ເກຍ ອູ໊ສິດທິເດດ ເຈົ້າຂອງທຸລະກິດ ( ບໍລິສັດອຸດົມຊັບ ແຮ່ຊາຍ, ບໍລິສັດອຸດົມຊັບກໍ່ສ້າງຈໍາກັດຜູ້ດຽວ ແລະ ໂຮງງານຜະລິດນໍ້າກ້ອນ ແລະ ນໍ້າດື່ມປາໂລມາຄໍາໄດ້ລາຍງານຕໍ່ ທ່ານ ປະທານປະເທດໃຫ້ຊາບວ່າ: ຕົນເອງເດ່ມືເຂົ້າໄປຊ່ວຍເຫລືອສ້າງງານ, ສ້າງອາຊີບ ແລະ ປົວແປງຊີວິດການເປັນຢູ່ໃຫ້ຜູ້ທຸກຍາກ ຫລື ຄົນຂໍທານ 27 ຄອບຄົວຢູ່ ບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດນັບແຕ່ປີ 2015 ເຊິ່ງໄດ້ຊັບຕົນເອງປະມານ 6 ຕື້ກວ່າກີບໂດຍບໍ່ຫວັງຜົນຕອບແທນເພື່ອເຮັດໃຫ້ກຸ່ມຜູ້ທຸກຍາກ ແລະ ຂໍທານເຫລົ່ານັ້ນຫັນກັບມາເຮັດອາຊີບທີ່ໝັ້ນຄົງ ແລະ ປະຖິ້ມອາຊີບຂໍທານ ປັດຈຸບັນນີ້ ຄົນຂໍທ່ານ 27 ຄອບຄົວໄດ້ປະຖິ້ມອາຊີບຂໍທານຢ່າງສິ້ນເຊີງແລ້ວຍ້ອນເຂົາເຈົ້າມີອາຊີບຖາວອນ, ມີການປູກ-ການລ້ຽງສົ່ງຂາຍຕະຫລາດສ້າງລາຍຮັບເຂົ້າຄອບຄົວປະຈໍາວັນ, ຈັດສັນເນື້ອທີ່ການຜະລິດ, ສ້າງເຮືອນໃຫ້, ສ້າງໂຮງຮຽນ ແລະ ອື່ນໆ.

ນັບແຕ່ປີ 2015 ທ່ານໄດ້ປະກອບສ່ວນທຶນຕົນເອງ 2 ຕື້ກວ່າກີບເຂົ້າໃນໂຄງການລຶບລ້າງຄວາມທຸກຍາກຊ່ວຍປະຊາຊົນ 27 ຄອບຄົວເປົ້າໝາຍຢູ່ ບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນເພື່ອ ເຮັດໃຫ້ເຂົາເຈົ້າມີການດຳລົງຊີວິດດີຂຶ້ນ, ຫຍັບຫ່າງອອກຈາກການໄປຂໍທານ, ຮູ້ອອກແຮງງານເພີ່ມພູນຜະລິດຜົນ ສ້າງເສດຖະກິດຄອບຄົວແບບກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງໃຫ້ຕົນເອງ ເຊິ່ງໂຄງການດັ່ງກ່າວໄດ້ສະໜອງເຂົ້າກິນຈຳນວນ 34.000 ກວ່າກິໂລມູນຄ່າ 158 ລ້ານກວ່າກີບ, ເຈາະນ້ຳບາດານ ຈຳນວນ 75 ໜ່ວຍ, ແອ່ງໃສ່ນ້ຳ 120 ໜ່ວຍ, ບຸກເບີກເນື້ອທີ່ນາ 110 ເຮັກຕາ, ແນວພັນເຂົ້າ 7.000 ກິໂລ, ສ້ອມແປງໂຮງຮຽນ-ຫ້ອງນໍ້າ, ຈັດສັນເນື້ອທີ່ສວນປູກພືດຕ່າງໆ 90 ຕອນ 42.870 ເຮັກຕາ, ມອບເຄື່ອງນຸ່ງຫົ່ມ, ອຸປະກອນການຮຽນ, ໜໍ່ກ້ວຍ 2. 000 ໜໍ່, ມັນຕົ້ນ, ໜໍ່ພ້າວ ແລະ ອື່ນໆ ພ້ອມດຽວກັນ ກໍຍັງໄດ້ຝຶກວິຊາຊີບໃຫ້ຄົນຂໍທານ, ເຊີນວິຊາການດ້ານປູກເຂົ້າ ລົງວິໄຈດິນນາ ແລະ ແນວພັນເຂົ້າທີ່ຈະປູກ ພ້ອມທັງແນະນຳວິທີການປູກ, ການບົວລະບັດຮັກສາ ແລະ ເກັບກ່ຽວຜົນລະປູກ, ນອກຈາກນັ້ນ, ໄດ້ຮ່ວມມືກັບ ສູນຈັດສັນອາຊີບຄົງທີ່ ຂອງເມືອງຈຳພອນ ເກັບຊື້ຜົນຜະລິດຈາກຊາວບ້ານ ເພື່ອສ້າງລາຍຮັບໃຫ້ເຂົາເຈົ້າ.

ໃນປີ 2016 ຂ້າພະເຈົ້າເຫັນວ່າຍັງມີຄວາມຈຳເປັນຫລາຍ ແລະ ໄດ້ຮັບຕື່ມອີກ 50 ຄອບຄົວ ເປັນ 70 ກວ່າຄອບຄົວກັບ 484 ຄົນ ເຊິ່ງປັດຈຸບັນນີ້ຊີວິດການຢູ່ຂອງເຂົາເຈົ້າໄດ້ຮັບການປັບປຸງດີຂຶ້ນກວ່າເກົ່າຫລາຍເທົ່າ ແລະ ກຸ່ມເປົ້າໝາຍກໍໄດ້ຢຸດໄປເລາະຂໍທານໄດ້ 90%. ສໍາລັບແຜນໃນຕໍ່ໜ້າຍັງສືບຕໍ່ຊ່ວຍເຫລືອປະຊາຊົນຢູ່ບ້ານໂນນຄ້າໃນ 30 ຄອບຄົວ ແຕ່ບໍ່ແມ່ນບ້ານເປົ້າໝາຍ ເຊິ່ງ ພວກເຮົາ ກຳລັງລົງໄປຊ່ວຍ ເປັນຂັ້ນຕອນທີ 2. ລະຫວ່າງວັນທີ 26 ມັງກອນ 2017 ຜ່ານມານີ້, ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວກໍໄດ້ລົງເຄື່ອນໄຫວຢ້ຽມຢາມ ແລະ ໃຫ້ທິດຊີ້ນຳທາງ ອຳນາດການປົກຄອງເມືອງສົມທົບກັບບໍລິສັດທີ່ໄກ້ຄຽງ ແລະ ໂຮງງານຜະລິດນໍ້າກ້ອນ ແລະ ນໍ້າດື່ມປາໂລມາຄໍາຂອງພວກເຮົານີ້ ໄປຊ່ວຍອີກ ເພາະເຫັນຫລາຍຄອບຄົວຖອຍຫ່າງຈາກການຂໍທານກິນ ໂດຍຟື້ນຖານ ປັດຈຸບັນນີ້ ໃນເຂດດັ່ງກ່າວກຳລັງເກີດໜໍ່ແໜງ ໃຫ້ປະຊາຊົນຮູ້ການປູກຝັງ, ລ້ຽງສັດ ເພື່ອປະກັນໃຫ້ເຂົາເຈົ້າກຸ້ມກິນ ແລະ ຢູ່ໄດ້ດ້ວຍຕົນເອງ. ໂດຍ: ນໍ້າອອ້ຍຂົມ