ພິທີມອບ-ຮັບ ຕຳແໜ່ງຫົວໜ້າຫ້ອງການຜູ້ເກົ່າ ແລະ ຜູ້ໃໝ່ ແລະ ປະກາດການແຕ່ງຕັ້ງບັນດາຫົວໜ້າກົມຄົນໃໝ່ ຂອງກະຊວງການຕ່າງປະເທດ

ໃນຕອນບ່າຍຂອງວັນທີ 20 ມິຖຸນາ 2018, ກົມຈັດຕັ້ງ ແລະ ພະນັກງານ, ກະຊວງການຕ່າງປະເທດ, ໄດ້ຈັດຕັ້ງພິທີປະກາດການແຕ່ງຕັ້ງຫົວໜ້າກົມໃໝ່ 4 ກົມ ຄື: ຫ້ອງການກະຊວງ, ກົມເອີຣົບ ແລະ ອາເມລິກາ, ກົມກົງສຸນ, ຫ້ອງການບໍລິການສະຖານທູດ ແລະ ໄດ້ຈັດພິທີມອບ-ຮັບໜ້າທີ່ ລະຫວ່າງ ຫົວໜ້າກົມຜູ້ເກົ່າ ແລະ ຜູ້ໃໝ່, ໂດຍໃຫ້ກຽດເຂົ້າຮ່ວມເປັນສັກຄີພິຍານໂດຍ ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ, ບັນດາຮອງລັດຖະມົນຕີ, ຫົວໜ້າກົມ ແລະ ຮອງຫົວໜ້າກົມ ຂອງກະຊວງການຕ່າງປະເທດ ທີ່ໄດ້ຖືກເຊີນເຂົ້າຮ່ວມໃນພີທີຄັ້ງນີ້ ມີຈຳນວນທັງໝົດ 25 ທ່ານ. ໃນພີທີໄດ້ປະກາດການແຕ່ງຕັ້ງ ດັ່ງນີ້:

1. ແຕ່ງຕັ້ງ ທ່ານ ໂພໄຊ ໄຂຄຳພິທູນ, ເປັນຫົວໜ້າຫ້ອງການກະຊວງ ຕາມດຳລັດວ່າດ້ວຍການແຕ່ງຕັ້ງຫົວໜ້າຫ້ອງການກະຊວງ ສະບັບເລກທີ 190/ນຍ, ລົງວັນທີ 7/6/2018;

2. ແຕ່ງຕັ້ງ ທ່ານ ບຸນເຫຼືອ ພັນດານຸວົງ, ເປັນຫົວໜ້າກົມກົງສຸນ, ຕາມດໍາລັດວ່າດ້ວຍການແຕ່ງຕັ້ງຫົວໜ້າກົມກົງສຸນ ສະບັບເລກທີ 189/ນຍ, ລົງວັນທີ 7/6/2018;

3. ແຕ່ງຕັ້ງ ທ່ານ ພົມມາ ຄຳມະນີຈັນ, ເປັນຫົວໜ້າກົມເອີຣົບ ແລະ ອາເມລິກາ, ຕາມດຳລັດວ່າດ້ວຍການແຕ່ງຕັ້ງຫົວໜ້າກົມເອີຣົບ ແລະ ອາເມລິກາ ສະບັບເລກທີ 191 ລົງວັນທີ 7/6/2018;

4. ແຕ່ງຕັ້ງ ທ່ານ ສິນໃຈ ມະນີວັນ, ເປັນຫົວໜ້າຫ້ອງການບໍລິການສະຖານທູດ, ຕາມດຳລັດວ່າດ້ວຍການແຕ່ງຕັ້ງຫົວໜ້າຫ້ອງການບໍລິການສະຖານທູດ ສະບັບເລກທີ 193/ນຍ, ລົງວັນທີ 7/6/2018.

ສະນັ້ນ, ເພື່ອປະຕິບັດຕາມດຳລັດວ່າດ້ວຍການແຕ່ງຕັ້ງຫົວໜ້າກົມດັ່ງກ່າວ, ຈຶ່ງໄດ້ມີພິທີລົງນາມມອບ-ຮັບໜ້າທີ່ ຫົວໜ້າກົມຜູ້ເກົ່າ ແລະ ຜູ້ໃໝ່ ຄື: ລະຫວ່າງ ທ່ານ ບຸນເຫຼືອ ພັນດານຸວົງ, ຫົວໜ້າຫ້ອງການກະຊວງ ຜູ້ເກົ່າ ແລະ ທ່ານ ໂພໄຊ ໄຂຄຳພິທູນ, ຫົວໜ້າຫ້ອງການກະຊວງ ຜູ້ໃໝ່ ແລະ ລະຫວ່າງ ທ່ານ ຂວັນຕາ ຜາລີວົງ, ຫົວໜ້າກົມເອີຣົບ ແລະ ອາເມລິກາ ຜູ້ເກົ່າ ແລະ ທ່ານ ພົມມາ ຄຳມະນີຈັນ, ຫົວໜ້າກົມເອີຣົບ ແລະ ອາເມລິກາ ຜູ້ໃໝ່.

ໃນພິທີມອບ-ຮັບໜ້າທີ່ໃໝ່ໃນຄັ້ງນີ້, ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ ກໍໄດ້ໃຫ້ກຽດໂອ້ລົມ ແລະ ໃຫ້ຄຳໂອວາດແກ່ ບັນດາຫົວໜ້າກົມທີ່ໄດ້ຮັບການແຕ່ງຕັ້ງໃໝ່ ໃຫ້ມີຄວາມໝັກແໜ້ນ ແລະ ຍົກສຸງຄວາມເປັນແບບຢ່າງນຳໜ້າທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນການນຳພາ, ຄວາມເສຍສະຫຼະເພື່ອສ່ວນລວມ, ຄວາມສາມັກຄີ ແລະ ເປັນເອກະພາບກັນ, ເດັດດ່ຽວສະກັດກັ້ນ ແລະ ຕ້ານປະກົດການຫຍໍ້ທໍ້ຕ່າງໆ. ຕ້ານແນວຄິດສວຍໂອກາດ, ສວຍໃຊ້ໜ້າທີ່ຕຳແໜ່ງ, ພະຍາດອາດຍາສິດ, ເອກະຊົນ, ສໍ້ລາດບັງຫຼວງ ແລະ ຂາດຄວາມຮັບຜິດຊອບຕໍ່ໜ້າທີ່ວຽກງານ ທີ່ໄດ້ຮັບການມອບໝາຍ.