ທະນາຄານໂລກ ສະໜອງເງິນກູ້ ປັບປຸງ-ສ້ອມແປງເສັ້ນທາງແຕ່ສີເກີດ-ໂພນໂຮງ
ທະນາຄານໂລກ (WB) ສະໜອງເງິນກູ້ 320 ຕື້ກີບ ຫຼື ປະມານ 40 ລ້ານໂດລາສະຫະລັດ ໃຫ້ລັດຖະບານລາວ ເພື່ອປະກອບສ່ວນນຳໃຊ້ເຂົ້າໃນການປັບປຸງ ແລະ ສ້ອມແປງເສັ້ນທາງເລກທີ 13 ເໜືອ ນັບແຕ່ບ້ານສີເກີດ ນະຄອນຫຼວງວຽງຈັນ-ໂພນໂຮງ ແຂວງວຽງຈັນ (ກິໂລແມັດທີ 12-ກິໂລແມັດທີ 70) ເພື່ອແນໃສ່ປັບປຸງສະພາບເສັ້ນທາງ ຄວາມປອດໄພທາງຖະໜົນ ແລະ ຄວາມທົນທານຂອງຖະໜົນຕໍ່ການປ່ຽນແປງຂອງດິນຟ້າອາກາດ ເຊິ່ງທາງເລກທີ 13 ເໜືອເປັນເສັ້ນທາງສຳຄັນທີ່ເຊື່ອມຕໍ່ລະຫວ່າງພາຍໃນປະເທດ ກໍ່ຄື ສປປ ລາວ ກັບພາກພື້ນ.
ພິທີລົງນາມສັນຍາເງິນກູ້ດັ່ງກ່າວ ຈັດຂຶ້ນວັນທີ 23 ກໍລະກົດ 2018 ຢູ່ກະຊວງການເງິນ ລະຫວ່າງທ່ານນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ແລະ ທ່ານ ນິໂກລາ ປອນຕາຣາ ຫົວໜ້າຫ້ອງການ WB ປະຈຳລາວ ມີທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຍທຂ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ການຈັດຕັ້ງປະຕິບັດໂຄງການນີ້ ຈະເລີ່ມແຕ່ປີ 2018-2023 ໂດຍກະຊວງໂຍທາທິການ ແລະ ຂົນສົ່ງ (ຍທຂ) ໃນນີ້ ແຫຼ່ງທຶນແມ່ນໄດ້ຈາກສະມາຄົມເພື່ອການພັດທະນາສາກົນ WB 40 ລ້ານໂດລາສະຫະລັດ ທຶນສົມທົບຈາກທະນາຄານເພື່ອການລົງທຶນໃນພື້ນຖານໂຄງລ່າງ (AIIB) 40 ລ້ານໂດລາສະຫະລັດ ລັດຖະບານລາວ 308 ຕື້ກີບ ຫຼື ປະມານ 38,5 ລ້ານໂດລາສະຫະລັດ ກອງທຶນພັດທະນານໍດິກ (NDF) ປະມານ 76 ຕື້ກີບ ຫຼື 9,5 ລ້ານໂດລາສະຫະລັດ.
ທ່ານລັດຖະມົນຕີກະຊວງ ຍທຂ ກ່າວວ່າ: ເສັ້ນທາງເລກທີ 13 ມີຄວາມສຳຄັນຫຼາຍຕໍ່ເສດຖະກິດ ດັ່ງນັ້ນການຍົກລະດັບ ຟື້ນຟູ ແລະ ປັບປຸງຮັກສາເສັ້ນທາງດັ່ງກ່າວຈະສາມາດຊ່ວຍປັບປຸງການເຂົ້າເຖິງຕະຫຼາດ ບ່ອນເຮັດວຽກ ແລະ ການບໍລິການດ້ານສາທາລະນະໃຫ້ດີຂຶ້ນ ແລະ ມີຄວາມປອດໄພໃນການສັນຈອນ ນອກນີ້ ຍັງຈະຊ່ວຍໃຫ້ ສປປ ລາວ ຫຍັບເຂົ້າໃກ້ເປົ້າໝາຍໃນການເຕີບໂຕຢ່າງຮອບດ້ານ.
ທ່ານ ນິໂກລາ ປອນຕາຣາ ກໍ່ໄດ້ກ່າວວ່າ: ການຍົກລະດັບ ຟື້ນຟູ ແລະ ປັບປຸງຮັກສາເສັ້ນທາງດັ່ງກ່າວຈະສາມາດເຮັດໃຫ້ການສັນຈອນມີຄວາມປອດໄພສູງຂຶ້ນ ເຖິງທີ່ໝາຍໄວຂຶ້ນ ແລະ ຮັບປະກັນຕໍ່ການນຳໃຊ້ ເຊິ່ງຈະສາມາດຊຸກຍູ້ການເຕີບໂຕແບບຮອບດ້ານ ແລະ ເຮັດໃຫ້ບັນຫາການດຳເນີນທຸລະກິດຂອງປະເທດດີຂຶ້ນ.
ພາບ-ຂ່າວ: ນສພ ວຽງຈັນໃຫ່ມ
© ໂຕະນໍ້າຊາ | www.tonamcha.com | www.tonamchanews.com
_______
Post a Comment