ສະຫະພາບຢຸໂຣບ ຊ່ວຍເຫຼືອ 30 ຕື້ກວ່າກີບ ແກ່ວຽກງານເກັບກູ້ລະເບີດບໍ່ທັນແຕກ ຢູ່ແຂວງຫົວພັນ
ວັນທີ 20 ທັນວາ 2018 ທີ່ໂຮງແຮມເສດຖາປາລາສ ນະຄອນຫຼວງວຽງຈັນ ໄດ້ມີພິທີລົງນາມບົດບັນທຶກການຊ່ວຍເຫຼືອ ວຽກງານເກັບກູ້ລະເບີດບໍ່ທັນແຕກຕົກຄ້າງ ຢູ່ແຂວງຫົວພັນ ລະຫວ່າງຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກຕົກຄ້າງຢູ່ ສປປ ລາວ (ຄຊກລ) ແລະ ອົງການເພື່ອມະນຸດສະທຳ ແລະ ການມີສ່ວນຮ່ວມ ເຊິ່ງໂຄງການຈັດຕັ້ງປະຕິບັດດັ່ງກ່າວ ໄດ້ຮັບທຶນຊ່ວຍເຫຼືອຈາກສະຫະພາບຢຸໂຣບ (EU) ດ້ວຍມູນຄ່າ 2.7 ລ້ານເອີໂຣ ຫຼື ປະມານ 30 ຕື້ກວ່າກີບ ມີໄລຍະການຈັດຕັ້ງປະຕິບັດງານແຕ່ນີ້ເຖິງປີ 2021.
ໂຄງການດັ່ງກ່າວ ມີເປົ້າໝາຍຢູ່ໃນ 44 ບ້ານເປົ້າໝາຍ ແລະ ໃນພື້ນທີ່ 9,450,000 ຕາແມັດ ທີ່ໄດ້ຮັບຜົນກະທົບຈາກລະເບີດລູກຫວ່ານ ພ້ອມທັງຈະພັດທະນາ ແລະ ສະໜັບສະໜູນແນວທາງການຄຸ້ມຄອງວຽກງານ ການໂຄສະນາສຶກສາຄວາມສ່ຽງໄພຈາກລູກລະເບີບໍ່ທັນແຕກ ໃນລະດັບຂັ້ນບ້ານໃຫ້ເປັນຮູບປະທຳໃນໄລຍະຍາວ, ຊອກຫາຫຼາກຫຼາຍວິທີ ເພື່ອສະໜັບສະໜູນວຽກງານການຄຸ້ມຄອງ ຄວາມສ່ຽງຈາກລູກລະເບີດບໍ່ທັນແຕກໃນຊຸມຊົນ ເພື່ອເຮັດໃຫ້ປະຊາຊົນສາມາດປະຕິບັດກິດຈະກຳ ກໍ່ຄື ການສ້າງສາພັດທະນາເສດຖະກິດ-ສັງຄົມໄດ້ຢ່າງປອດໄພ ໂດຍໂຄງການຈະໃຫ້ການເຝິກອົບຮົມ ຄູ-ອາຈານ ກ່ຽວກັບການສຶກສາຄວາມສ່ຽງໄພ ເພື່ອນຳໄປເຜີຍແຜ່ຜັນຂະຫຍາຍໃຫ້ກັບນັກຮຽນຂອງຕົນ ເຊິ່ງໃນປັດຈຸບັນນີ້ ສະເລ່ຍທຸກໆສອງເດືອນຈະມີເຫດການລະເບີດແຕກ ແລະ ສ້າງຜົນເສຍຫາຍໃຫ້ແກ່ຊີວິດຊັບສິນຂອງປະຊາຊົນຄັ້ງໜຶ່ງ ໃນນັ້ນ ໄດ້ເກີດຂຶ້ນກັບເດັກນ້ອຍນັກຮຽນເຂດພື້ນທີ່ສ່ຽງທີ່ບໍ່ທັນຮັບຮູ້ ແລະ ເຂົ້າໃຈເຖິງຜົນຮ້າຍຂອງລະເບີດບໍ່ທັນແຕກ ດັ່ງນັ້ນ ໂຄງການຈິ່ງເນັ້ນທີ່ຈະເຝິກອົບຮົມໃຫ້ແກ່ບັນດາຄູອາຈານ ໃນເຂດພື້ນທີ່ສ່ຽງໄພເປັນຕົ້ນຕໍ.
ຮ່ວມລົງນາມຄັ້ງນີ້ ໂດຍທ່ານ ພູຂຽວ ຈັນທະສົມບູນ ຫົວໜ້າຫ້ອງການ ຄຊກລ ແລະ ທ່ານ ເບີນົວ ຄູເຕີຣິແອ ຫົວໜ້າອົງການເພື່ອມະນຸດສະທຳ ແລະ ການມີສ່ວນຮ່ວມ ມີບັນດາຜູ້ຕາງໜ້າຈາກອຳນາດການປົກຄອງແຂວງຫົວພັນ ແລະ ແຂກຖືກເຊີນຈາກພາກສ່ວນກ່ຽວຂ້ອງເຂົ້າຮ່ວມ.
ພາບ ແລະ ຂ່າວ: ໜັງສືພິມ ວຽງຈັນໃໝ່
© ໂຕະນໍ້າຊາ | tonamcha.com
___________
Post a Comment