ຕຳຫຼວດລາວມອບຜູ້ຖືກຫາຄົນຈີນ 191 ຄົນ ໃຫ້ເຈົ້າໜ້າທີ່ຕຳຫຼວດຈີນ ໃນຄະດີຫຼອກລວງທາງໂທລະຄົມ
ວັນທີ 11 ມັງກອນນີ້ຜ່ານມານີ້ ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ, ເຈົ້າໜ້າທີ່ຕຳຫຼວດຈີນ-ລາວ ໄດ້ຈັດພິທີລົງນາມມອບ-ຮັບຜູ້ຕ້ອງຫາຄົນຈີນໃນຄະດີຫຼອກລວງທາງໂທລະຄົມ ໂດຍເຈົ້າໜ້າທີ່ຕຳຫຼວດລາວ ໄດ້ມອບຜູ້ຕ້ອງຫາຄົນຈີນຈຳນວນ 191 ຄົນໃຫ້ແກ່ເຈົ້າໜ້າທີ່ຕຳຫຼວດຈີນ ແລະຄຸມສົ່ງຄືນປະເທດຈີນເພື່ອດຳເນີນຄະດີຕາມກົດໝາຍ.
ຕົ້ນເດືອນທັນວາ ປີ 2018 ທີ່ຜ່ານມາ, ພາຍຫຼັງໄດ້ຮັບແຈ້ງຄວາມຈາກປະຊາຊົນ ເຈົ້າໜ້າທີ່ຕຳຫຼວດຈີນກໍ່ໄດ້ດຳເນີນການສືບສວນ-ສອບສວນ ແລະຮູ້ວ່າມີຄົນຈີນກຸ່ມໜຶ່ງໄດ້ດຳເນີນການຫຼອກລວງທາງໂທລະຄົມຢູ່ລາວ ໂດຍໄດ້ສ້າງຜົນກະທົບທີ່ບໍ່ດີຕໍ່ສັງຄົມລາວ. ຈາກນັ້ນ, ເຈົ້າໜ້າທີ່ຕຳຫຼວດຈີນກໍ່ໄດ້ປະສານສົມທົບກັບເຈົ້າໜ້າທີ່ຕຳຫຼວດລາວ ໂດຍສອງຝ່າຍໄດ້ຮ່ວມກັນທຳລາຍຈຸດຫຼອກລວງທາງໂທລະຄົມ 9 ຈຸດຢູ່ນະຄອນຫຼວງວຽງຈັນ ແລະສາມາດຈັບຜູ້ຕ້ອງຫາຄົນຈີນໄດ້ຈຳນວນ 191 ຄົນໃນທ້າຍເດືອນທັນວາຜ່ານມາ.
ໃນຫຼາຍປີມານີ້, ສອງປະເທດຈີນ-ລາວ ໄດ້ມີຜົນງານທີ່ໂດດເດັ່ນໃນການປະຕິບັດກົດໝາຍ ແລະຄວາມໝັ້ນຄົງຢ່າງຫຼວງຫຼາຍ. ອັນເປັນການປະກອບສ່ວນທີ່ສຳຄັນເຂົ້າໃນການປົກປັກຮັກສາຄວາມສະຫງົບກໍຄືການພັດທະນາເສດຖະກິດ-ສັງຄົມຂອງສອງປະເທດ. ປີ 2018 ຜ່ານມາ, ເຈົ້າໜ້າທີ່ຕຳຫຼວດສອງປະເທດໄດ້ຮ່ວມກັນມ້າງຄະດີປະເພດຕ່າງໆໄດ້ 30 ກວ່າຄະດີ ໂດຍຝ່າຍລາວໄດ້ຈັບ ແລະມອບຜູ້ຕ້ອງຫາຄົນຈີນໃນຄະດີເສດຖະກິດ, ອາດຍາ ແລະພະນັນທາງອິນເຕີເນັດ 50 ຄົນໃຫ້ແກ່ເຈົ້າໜ້າທີ່ຕຳຫຼວດຈີນເພື່ອໄປດຳເນີນຄະດີຕາມກົດໝາຍ.
ພາບ ແລະ ຂ່າວ: CRI FM93
___________
Post a Comment