ເຈົ້າໜ້າທີ່ແຂວງຫຼວງພະບາງ ຢຶດຊິ້ນສ່ວນຄ້າຍງາຊ້າງໄດ້ 3,484 ອັນ ພ້ອມຊິ້ນສ່ວນອື່ນໆອີກຫຼາຍກິໂລ
ໂດຍປະຕິບັດຕາມຄຳສັ່ງຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາສັດປ່າ ແລະ ພືດປ່າປະເພດຫວງຫ້າມ ດັ່ງນັ້ນ, ກົມກວດກາປ່າໄມ້ໄດ້ປະສານສົມທົບກອງກວດກາປ່າໄມ້ແຂວງຫຼວງພະບາງ ແລະ ພາກສ່ວນກ່ຽວຂ້ອງ ໂດຍສະເພາະແມ່ນເຄືອຄ່າຍການບັງຄັບໃຊ້ກົດໝາຍວ່າດ້ວຍສັດນ້ຳ ໍິ້ລະ ສັດປ່າ ຂັ້ນແຂວງ ທີ່ແຂວງຫຼວງພະບາງ ໄດ້ພ້ອມກັນລົງກວດກາການລັກລອບຄ້າ-ຂາຍຜະລິດຕະພັນຊິ້ນສ່ວນ (ງາຊ້າງ) ເປົ້າໝາຍບັນດາຮ້ານຂາຍເຄື່ອງຢູ່ນະຄອນຫຼວງພະບາງ ຄື: ຮ້ານວອກແມນ (Walkman) ຮ້ານລາວລໍຊຸນ ແລະ ຮ້ານອາຈຸນ ເຊິ່ງມີຜູ້ເຂົ້າຮ່ວມທັງໝົດ 30 ຄົນ ຈາກກົມກວດກາປ່າໄມ້ ກອງກວດກາປ່າໄມ້ ກອງບັນຊາການ ປກສ ແຂວງ ໜ່ວຍງານກວດກາປ່າໄມ້ເມືອງ ແລະ ອຳນາດການປົກຄອງບ້ານ.
ຜ່ານການກວດກາສັງລວມ ໄດ້ຄືດັ່ງນີ້: ຮ້ານວອກແມນ ພົບເຫັນຊິ້ນສ່ວນເປັນຜະລິດຕະພັນຄ້າຍຄືງາຊ້າງ ນ້ຳໜັກ 78.64 ກິໂລ ມີຊິ້ນສ່ວນທັງໝົດ 3,484 ອັນ ນ້ຳໜັກຊິ້ນສ່ວນທີ່ເປັນງາຊ້າງແທ້ 73.8 ກິໂລ ແລະ ເຂົາສັດປ່າອາຟຣິກກາ 1 ຄູ່ ຮ້ານອາຈຸນ ພົບເຫັນຜະລິດຕະພັນຄ້າຍງາຊ້າງນ້ຳໜັກ 25.5 ກິໂລ ການພິສູດຂອງຊ່ຽວຊານແມ່ນມີຈຳນວນ 936 ອັນ ນ້ຳໜັກ 24.99 ກິໂລ (ເປັນຂອງແທ້) ເຂົາກວາງ 1 ອັນ ນ້ຳໜັກ 3.1 ກິໂລ ແລະ ຮ້ານລາວບລອສຊອມ Lao Blossom ພົບເຫັນຜະລິດຕະພັນຄ້າຍງາຊ້າງທີ່ໄດ້ພິສູດຈາກຊ່ຽວຊານແມ່ນມີທັງໝົດ 96 ອັນ ນ້ຳໜັກ 1.3 ກິໂລ ເຊິ່ງຜູ້ກະທຳຜິດໄດ້ຖືກກັກໂຕ ແລະ ກຳລັງດຳເນີນຄະດີໄປຕາມຂະບວນຍຸຕິທຳ ນອກຈາກແຂວງຫຼວງພະບາງແລ້ວ ພາກສ່ວນກ່ຽວຂ້ອງ ຍັງຈະໄດ້ສືບຕໍ່ລົງກວດກາຢູ່ບັນດາແຂວງຕ່າງໆໃນຂອບເຂດທົ່ວປະເທດ ໂດຍສະເພາະແມ່ນແຂວງເປົ້າໝາຍ.
ຂໍ້ມູນ : ໜັງສືພິມວຽງຈັນໃໝ່
© ໂຕະນໍ້າຊາ | tonamcha.com
___________
Post a Comment