ທົ່ວປະເທດ ພົບຄົນເຈັບພະຍາດໄຂ້ຍຸງລາຍຫຼາຍກວ່າ 700 ກໍລະນີ
ທ່ານ ດຣ ຈັນທະໄລ ໄຊຍະວົງ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກ ນະຄອນຫຼວງວຽງຈັນ ກ່າວໃນວັນທີ 18 ກຸມພາ 2019 ວ່າ: ນັບແຕ່ວັນທີ 30 ທັນວາ 2018 ເຖິງປັດຈຸບັນ ນະຄອນຫຼວງວຽງຈັນ ພົບຜູ້ຕິດເຊື້ອພະຍາດໄຂ້ຍຸງ 201 ກໍລະນີ ເສຍຊີວິດ 4 ກໍລະນີ ອັດຕາຄວາມຮ້າຍແຮງຂອງພະຍາດ 2,4% ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນສູງສົມຄວນ ຮອງລົງມາແມ່ນແຂວງອັດຕະປື ມີຜູ້ຕິດເຊື້ອພະຍາດໄຂ້ຍຸງ 274 ກໍລະນີ ຫຼວງນ້ຳທາ 110 ກໍລະນີ ຈຳປາສັກ 73 ກໍລະນີ ບໍລິຄຳໄຊ 20 ກໍລະນີ ວຽງຈັນ 15 ກໍລະນີ ສະຫວັນນະເຂດ 11 ກໍລະນີ ເຊກອງ 13 ກໍລະນີ ສາລະວັນ 10 ກໍລະນີ ຄຳມ່ວນ 5 ກໍລະນີ ຫຼວງພະບາງ 1 ກໍລະນີ ສ່ວນໄຊຍະບູລີ ບໍ່ແກ້ວ ອຸດົມໄຊ ຜົ້ງສາລີ ຊຽງຂວາງ ໄຊສົມບູນ ແລະ ແຂວງຫົວພັນ ບໍ່ພົບກໍລະນີ ສັງລວມແລ້ວທົ່ວປະເທດພົບກໍລະນີໄຂ້ຍຸງລາຍ 733 ກໍລະນີ ເສຍຊີວິດ 4 ກໍລະນີ ຄວາມຮ້າຍແຮງຂອງພະຍາດ 0.76%.
ເພື່ອເປັນການຕ້ານ ແລະ ສະກັດກັ້ນພະຍາດດັ່ງກ່າວ ພະແນກສາທາລະນະສຸກ ນະຄອນຫຼວງວຽງຈັນ ໄດ້ສຸມໃສ່ຜັນຂະຫຍາຍຄຳແນະນຳເລກທີ 0001/ຈນວ ວ່າດ້ວຍການກະກຽມສະກັດກັ້ນພະຍາດໄຂ້ຍຸງລາຍ ໂດຍໄດ້ສຸມໃສ່ຊີ້ນຳໃຫ້ຫ້ອງການສາທາລະນະສຸກ 9 ຕົວເມືອງ ລົງຊີ້ນຳປະຊາຊົນອະນາໄມສິ່ງແວດລ້ອມ ກຳຈັດແຫຼ່ງເຜາະພັນໜອນນ້ຳຍຸງລາຍ ໄປພ້ອມກັບປະສານໃຫ້ບັນດາບ້ານເອົາໃຈໃສ່ລົງກວດໜອນນ້ຳຍຸງລາຍ ໂຄສະນາສຸຂະສຶກສາ ໂດຍສະເພາະ ການຈັດຕັ້ງປະຕິບັດຫຼັກການ 5 ປ ຄື: ປົກປິດພາຊະນະທີ່ກັກເກັບນ້ຳທັງໃນ ແລະ ນອກເຮືອນບໍ່ໃຫ້ຍຸງລາຍມາໄຂ່ໃສ່ ປ່ຽນນ້ຳ ແລະ ຜັດຖູທາງດ້ານໃນຂອງພາຊະນະທີ່ກັກເກັບນ້ຳ ເຊັ່ນ: ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ ອ່າງເກັບນ້ຳເສຍຫຼັງຕູ້ເຢັນ ປ່ອຍປາຫາງນົກຍຸງເພື່ອກິນໜອນນ້ຳຢູ່ຕາມອ່າງທີ່ໃຫຍ່ ບໍ່ສາມາດຂ້ວມລ້າງໄດ້ ປັບປຸງສິ່ງແວດລ້ອມໃຫ້ສະອາດເປັນປະຈຳທຸກໆອາທິດ ບໍ່ມີກະໂປະ ກະປ໋ອງ ຢາງຕີນລົດ ແລະ ນ້ຳຂັງ ເຊິ່ງເປັນແຫຼ່ງເພາະພັນຂອງຍຸງ ເປັນໄຂ້ຮີບຟ້າວໄປພົບໝໍຢູ່ໂຮງໝໍໃກ້ບ້ານທ່ານ ບໍ່ຄວນຖືເບົາຊື້ຢາກິນເອງ ເພາະຖ້າຊັກຊ້າອາດພາໃຫ້ເສຍຊີວິດ. ພາບ-ຂ່າວ: ໜັງສືພິມວຽງຈັນໃໝ່
___________
Post a Comment