Header Ads

ສປປ ລາວ ຈະເປັນສ່ວນໜຶ່ງ ໃນຂະບວນຮັກສາ ສັນຕິພາບ-ເປີດກວ້າງ ສູ່ໂລກພາຍນອກ





ໃນຍຸກໂລກາພິວັດ ແລະ ການເຊື່ອມໂຍງນີ້, ສປປ ລາວ ຈະເປັນສ່ວນໜຶ່ງ ​ເຖິງ​ຈະ​ເປັນ​ສ່ວນ​ນ້ອຍໆ​ກໍ​ຕາມ ຂອງຂະບວນການ ປົກປັກຮັກສາ ສັນຕິພາບ, ເສີມສ້າງມິດຕະພາບ, ເປີດກວ້າງປະເທດ ອອກສູ່ໂລກພາຍນອກ ແລະ ຍິນດີຮັບເອົາການ ສະໜັບສະໜູນ, ຊ່ວຍເຫລືອ, ການລົງທຶນຈາກພາຍນອກ, ພ້ອມ​ນີ້ ຈະຕັ້ງໜ້າປະຕິບັດພັນທະຂອງຕົນ ໃນການເປັນສະມາຊິກ ທີ່ດີ ຂອງອົງການຈັດຕັ້ງສາກົນ ແລະ ພາກພື້ນ.

ທ່ານ ທອງ
​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ ກ່າວ​ປາ​ໄສໃນກອງປະຊຸມສາກົນກ່ຽວກັບ ອະນາຄົດຂອງອາຊີ ຄັ້ງທີ 23ທີ່ປະເທດຍີ່ປຸ່ນໂດຍລະບຸຕື່ມວ່າ: ລັດຖະບານ ລາວ ຈະສຸມ​ໃສ່ຈັດຕັ້ງປະຕິບັດ ວິໄສທັດ 2030 ແລະ ຍຸດທະສາດ 2025 ແລະ ແຜນ 5 ປີ 2020 ໃນການພັດທະນາປະເທດ ແລະ ມີເປົ້າໝາຍພັດທະນາ ປະເທດຕາມທິດຍືນ​ຍົງ ແລະ  ສີຂຽວ, ພ້ອມ​ທັງຫັນເອົາ 17 ເປົ້າໝາຍ ການພັດທະນາ​ແບບ​ຍືນ​ຍົງ (SDG) ຂອງສະຫະປະຊາຊາດ ເຂົ້າເປັນແຜນງານ ລະດັບຊາດ ຂອງຕົນຢ່າງຕັ້ງໜ້າ. ພ້ອມນັ້ນ, ສປປ ລາວ ກໍໄດ້ຮັບຮອງເອົາເປົ້າໝາຍທີ 18 ຄື: ຊີວິດທີ່ປອດໄພຈາກ ລະເບີດບໍ່ທັນແຕກ ເພີ່ມເຂົ້າເປັນເປົ້າໝາຍ ການພັດທະນາແບບຍືນຍົງ ຂອງປະເທດ ​ເພື່ອຈະສ້າງສະພາບແວດລ້ອມ ພາຍໃນ ແລະ ສາກົນ ທີ່ໝັ້ນທ່ຽງ ເພື່ອສໍາເລັດເປົ້າໝາຍ ແຫ່ງການພັດທະນາຂອງຕົນ.




ທ່ານ ທອງ​ລຸນ ສີ​ສຸ​ລິດ ຊີ້​ໃຫ້​ເຫັນຕື່ມ​ວ່າ: ອາຊີ ຈະເດີນໜ້າໄປສູ່ ອະນາຄົດອັນແຈ່ມໃສ ແລະ ຈະເຫັນ ສັດຕະວັດທີ 21 ນີ້ ເປັນສັດຕະວັດ ຂອງອາຊີທີ່ແທ້ຈິງ, ເພາະອາຊີ ມີຄວາມສາມາດບົ່ມຊ້ອນ ໃນທຸກໆດ້ານ ທີ່ຈະພາໃຫ້ກ້າວໄປຢ່າງບໍ່​ຢຸດ​ຢັ້ງ, ອາຊີ ຈະ​ເປັນ​ສ່ວນ​ສໍາຄັນ ​ເພື່ອ​ຂັບ​ເຄື່ອນ ​ຂະ​ບວນວິວັດ​ຂອງ​ໂລກາ​ພິວັດ​ໄດ້. ໂດຍທົ່ວໄປແລ້ວ ໃນອະດີດ, ອາຊີຂອງພວກເຮົາ ເຄີຍໄດ້ຮັບເຄາະຮ້າຍ ຈາກຄວາມຂັດແຍ່ງ ຢູ່ໃນຂົງເຂດຕ່າງໆຂອງໂລກ,​ ແຕ່ອາຊີ ຍັງໄດ້ມີຄວາມສາມາດ ແກ້ໄຂບັນຫາຂອງອາຊີເອງໄດ້ ຕະຫລອດໄລຍະທີ່ຜ່ານມາ. ເຖິງວ່າມີປະຫວັດຄວາມເປັນມາ ທີ່ຂຶ່ນຂົມຫລາຍຢ່າງ, ແຕ່ດ້ວຍສັດຈະທໍາ ທີ່ວ່າຄົນອາຊີ ແມ່ນຄົນຮັກສັນຕິພາບ, ມັກຄວາມສະຫງົບ, ໄຝ່ຫາການພັດທະນາ ແບບຍືນຍົງ, ຮ່ວມ​ກັນ, ມີ​ນໍ້າ​ໃຈ​ຊ່ວຍ​ເຫລືອ​ເກື້ອກູນ​ກັນ, ສະ​ແຫວ​ງຫາ​ຄວາມ​ເປັນມິດກັບ ທຸກປະເທດໃນໂລກນັ້ນ, ອາຊີ ຈະກ້າວໄປຕາມກະແສໂລກາພິວັດ.






ບົນຈິດໃຈດັ່ງກ່າວ, 
ນາຍົກລັດຖະມົນຕີ ​ເຫັນ​ວ່າ: ພາກພື້ນອາຊີ ຈະຕ້ອງໄດ້ຄໍານຶງ ເຖິງບັນຫາ ສັນຕິພາບ, ສະຖຽນລະພາບ ແລະ ການຮ່ວມມືທີ່ຕ່າງຝ່າຍ ຕ່າງໄດ້ຮັບຜົນປະໂຫຍດ ແລະ ຄວນຖືບັນ ຫານີ້ ເປັນສິ່ງສຳຄັນແຖວໜ້າ ໃນຍຸກໂລກາພິວັດ ແລະ ເຊື່ອມໂຍງນີ້ ​ເຊິ່ງທຸກ​ປະ​ເທດ​ໃນອາຊີ ຕ້ອງໄດ້ຮ່ວມແຮງຮ່ວມໃຈກັນ​ 3 ປະການ ຄື: ຕ້ອງເພີ່ມທະວີ ຄວາມພະຍາຍາມ ໃນການຮັບປະກັນ ສັນຕິພາບ ແລະ ຄວາມໝັ້ນຄົງ ດ້ວຍການແກ້ໄຂບັນຫາ ຂໍ້ຂັດແຍ່ງຕ່າງໆ ໂດຍສັນຕິວິທີ, ຫລີກລ້ຽງການໃຊ້ກຳລັງ ຫລື ການນາບຂູ່ ດ້ວຍກຳລັງທຸກຮູບແບບ, ​ສົງຄາມ​ມີແຕ່ຈະນໍາ ຄວາມຫາຍຍະນະ ມາສູ່ພາກພື້ນ ແລະ ບັນດາປະເທດຕ່າງໆ; ເພີ່ມທະວີການຊ່ວຍເຫລືອ ເຊິ່ງກັນ ແລະ ກັນ ດ້ານການພັດທະນາ ​ເພື່ອຮັດແຄບຄວາມແຕກໂຕນກັນ, ໃຫ້ທຸກປະເທດເຫັນຜົນໄດ້ ຂອງຂະບວນວິວັດ ຂອງໂລກາພິວັດ ແລະ ຜົນໄດ້ຂອງ ການເຊື່ອມໂຍງ, ເຊື່ອມຈອດທີ່ເປັນປະໂຫຍດອາຊີ ຄວນຫັນເອົາຄວາມແຕກຕ່າງ ແລະ ຄວາມຫລາກຫລາຍ ໃຫ້ກາຍເປັນກໍາລັງແຮງ ແຫ່ງການຮ່ວມມື ໃຫ້ແກ່ການພັດທະນາ, ສາມາດເປັນປະຊາຄົມ ແຫ່ງການຮຽນຮູ້,​ ແບ່ງປັນ, ຊ່ວຍເຫລືອກັນໄດ້ ເພື່ອກ້າວສູ່ການເປັນໂລກາພິວັດ.

ຂ່
າວ:ຣາຊະ​ວົງ /  ຂປລ 
© ໂຕະນໍ້າຊາ | tonamcha.com   
___________


Powered by Blogger.