Header Ads

ລັດຖະມົນຕີກະຊວງການຕ່າງປະເທດ ຕ້ອນຮັບ ທູດນິວຊີແລນເຂົ້າຢ້ຽມຂໍ່ານັບອໍາລາ


ໃນວັນທີ 23 ສິງຫາ 2017 , ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອໍາລາ ຂອງທ່ານ ເບັນ ຄິງ ເອກອັກຄະລັດຖະທູດ ນິວຊີແລນ ປະຈຳ ສປປ ລາວ, ໃນໂອກາດສໍາເລັດການປະຕິບັດໜ້າທີ່ການທູດ ຢູ່ ສປປ ລາວ ເຊິ່ງມີສໍານັກງານ ຕັ້ງຢູ່ບາງກອກ ປະເທດໄທ.

​ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ທ່ານທູດ ທີ່ໄດ້ເຄື່ອນໄຫວຢ່າງຫ້າວຫັນ ເຂົ້າໃນການປະຕິບັດໜ້າທີ່ການທູດ ຢູ່ ສປປ ລາວ ຕະຫລອດໄລຍະ 1 ປີ ຜ່ານມາ, ຊຶ່ງເຫັນໄດ້ຈາກຄວາມພະຍາຍາມ ແລະ ເອົາໃຈໃສ່ໃນການເສີມ ຂະຫຍາຍສາຍພົວພັນ ແລະ ການຮ່ວມມື ລະຫວ່າງສອງປະເທດ ທີ່ມີມາແລ້ວນັ້ນ ໃຫ້ໄດ້ຮັບການຂະຫຍາຍຕົວ ໃນຫລາຍຂົງເຂດຢ່າງຕໍ່ເນື່ອງ ເປັນຕົ້ນແມ່ນການ ຮ່ວມມືດ້ານກະສິກໍາ ເຊັ່ນ: ໂຄງການຊ່ວຍເຫລືອ ການຄວບຄຸມພະຍາດປາກເປື່ອຍລົງເລັບ  ສັດລ້ຽງ ໃນໄລຍະ 5 ປີ (2016-2020) ແລະ ໂຄງ ການຄຸນນະພາບຊີ້ນງົວ ຢູ່ ສປປ ລາວ ແຕ່ ປີ 2017-2021, ຊຶ່ງໄດ້ລົງນາມກັນ ໃນເດືອນກໍລະກົດ 2017 ທີ່ຜ່ານມາ. ໃນຂະນະດຽວກັນ, ທ່ານ ສະເຫລີມໄຊ ກົມມະສິດ ກໍໄດ້ສະແດງຄວາມຂອບໃຈ ແລະ ຮູ້ບຸນຄຸນ ໂດຍຜ່ານທ່ານທູດ ໄປຍັງລັດຖະບານນິວຊີແລນ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ໃນຫລາຍດ້ານ ເປັນຕົ້ນ ທາງດ້ານການ ພັດທະນາຊັບພະຍາກອນມະນຸດ, ໂຄງການສົ່ງເສີມກິດຈະກໍາ ການທ່ອງທ່ຽວໄລຍະ 1 ແລະ ໄລຍະ 2 ແຕ່ປີ 2015-2020, ໂຄງການເກັບກູ້ລະເບີດບໍ່ທັນແຕກ ແລະ ການຊ່ວຍເຫລືອ ໃນການກຽມຄວາມພ້ອມດ້ານບຸກຄະລາກອນ ໃຫ້ແກ່ ສປປ ລາວ ເພື່ອ ເປັນເຈົ້າພາບຈັດກອງປະ ຊຸມອາຊຽນ ໃນປີ 2016 ທີ່ໄດ້ຮັບຜົນສໍາເລັດຢ່າງຈົບງາມ.

ພ້້ອມດຽວ​ກັນນັ້ນ, ທ່ານ ສະເຫລີມໄຊ ກົມມະສິດ ກໍໄດ້ສະແດງຄວາມຊົມເຊີຍ ຕໍ່ທ່ານທູດ ທີ່ໄດ້ຖືກແຕ່ງຕັ້ງ ເປັນຮອງຫົວໜ້າຫ້ອງການ ກະຊວງການຕ່າງປະເທດ ນິວຊີແລນ ທີ່ຮັບຜິດຊອບຂົງ ເຂດອາເມລິກາ ແລະ ອາຊີ ແລະ ເຊື່ອໜັ້ນວ່າ ພາຍຫລັງທີ່ທ່ານທູດ ເດີນທາງກັບຄືນປະເທດແລ້ວ ຈະສືບຕໍ່ສົ່ງເສີມ ຊຸກຍູ້ການພົວພັນ ແລະ ການຮ່ວມມື ລາວ-ນິວຊີແລນ ໃຫ້ນັບມື້ຂະຫຍາຍຕົວຍິ່ງໆ ຂຶ້ນ.

ໃນໂອກາດດຽວກັນ, ທ່ານທູດ ກໍໄດ້ສະແດງຄວາມຂອບອົກ​ຂອບໃຈຕໍ່ ທ່ານລັດຖະມົນຕີ ທີ່ໄດ້ສະຫລະ​ເວລາ ໃຫ້ການຕ້ອນຮັບອັນ​ອົບ​ອຸ່ນໃນຄັ້ງນີ້, ພ້ອມທັງໄດ້ແຈ້ງໃຫ້ຊາບກ່ຽວກັບ ການເຊື້ອເຊີນ ທ່ານລັດຖະມົນຕີ ໄປຢ້ຽມຢາມ ນິວຊີແລນ ໃນເວລາທີ່ເໜາະສົມ.


ຂ່າວ: ວິໄລສັກ, ພາບ: ເກດສະໜາ/ຂປລ 
© ໂຕະນໍ້າຊາ | tonamcha.com    
___________

Powered by Blogger.