ກຽມດຳເນີນການໂຄງການ ພະລັງງານແສງຕາເວັນ ຂະໜາດໃຫຍ່ຢູ່ ສປປ ລາວ
ພິທີເຊັນບົດບັນທຶກ ຄວາມເຂົ້າໃຈ (MOU) ເພື່ອສຳຫລວດເນື້ອທີ່ດິນ ແລະ ສຶກສາຄວາມເປັນໄປໄດ້ ໃນການລົງທຶນພັດທະນາ ໂຮງໄຟຟ້າພະລັງງານ ແສງຕາເວັນຂະໜາດໃຫຍ່ ຢູ່ແຂວງອັດຕະປື ແລະ ແຂວງບໍລິຄຳໄຊ ໄດ້ມີຂຶ້ນໃນວັນທີ 31 ສິງຫາ 2017 ຢູ່ນະຄອນຫລວງວຽງຈັນ, ລະຫວ່າງ ທ່ານ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ ກັບ ທ່ານ ຮາລີ ອາຈູທານ ປະທານຜູ້ບໍລິຫານ ບໍລິສັດຄອນວໍ Energy LLC ແລະ ເຊັນເປັນພິຍານ ໂດຍມີທ່ານ ສົມພິດ ແກ້ວວິຈິດ ຮອງຫົວໜ້າ ກົມທຸລະກິດພະລັງງານ ກະຊວງພະລັງງານ ແລະ ບໍ່ແຮ່, ທ່ານ ສົນທອງ ວີບຸນກວ້າງ ຮອງຫົວໜ້າ ພະແນກແຜນການ ແລະ ການລົງທຶນ ແຂວງ ບໍລິຄຳໄຊ, ທ່ານ ສຸລິຈັນ ພອນແກ້ວ ຫົວໜ້າພະແນກແຜນການ ແລະ ການລົງທຶນ ແຂວງ ອັດຕະປື, ທ່ານ ວ່າງ ລັດຕະນະວົງ ທີ່ປຶກສາບໍລິສັດຄອນວໍ Energy LLC ແລະ ທ່ານ ໂປລເຮີ ຜູ້ອຳນວຍການບໍລິສັດຄອນວໍ Energy LLC ປະຈຳ ສປປ ລາວ, ພ້ອມດ້ວຍພາກສ່ວນກ່ຽວຂ້ອງ ທັງສອງຝ່າຍ ເຂົ້າຮ່ວມ ເປັນສັກຂີພິຍານ.
ໂຄງການລົງທຶນພັດທະນາ ໂຮງໄຟຟ້າພະລັງງານ ແສງຕາເວັນ ແມ່ນການລົງທຶນ ຂອງສະຫະລັດອາເມລິກາ, ໂດຍມີມູນຄ່າການລົງທຶນ ຫລາຍກວ່າ 400 ລ້ານໂດລາສະຫະລັດ ແລະ ຈະເລີ່ມລົງມືກໍ່ສ້າງ ພາຍໃນປີ 2019 ຢູ່ເຂດບ້ານນ້ຳເດື່ອ ເມືອງປາກກະດິງ ແຂວງບໍລິຄຳໄຊ ມີເນື້ອທີ່ທັງໝົດ 150 ເຮັກຕາ ແລະ ຢູ່ແຂວງອັດຕະປື ມີເນື້ອທີ່ 464 ເຮັກຕາ. ໂຄງການດັ່ງກ່າວ, ຈະຊ່ວຍເພີ່ມຄວາມຫລາກຫລາຍ ທາງດ້ານການຜະລິດ ພະລັງງານໄຟຟ້າຂອງລາວ, ທັງເປັນການເພີ່ມທະວີ ການຜະລິດພະລັງງານ ໃນລະດູແລ້ງ ແລະ ຈະສາມາດສ້າງໂອກາດ ທາງທຸລະກິດເພີ່ມຂຶ້ນ ໃຫ້ກັບບັນດາທຸລະກິດ ແລະ ພະລັງງານ ລາວ ແລະ ສະຫະລັດອາເມລິກາ ແລະ ຄາດວ່າໂຄງການດັ່ງກ່າວ, ຈະສາມາດສ້າງ ວຽກເຮັດງານທຳໄດ້ 400 ຕຳແໜ່ງງານ ໃນຂະແໜງການກໍ່ສ້າງ ແລະ 200 ຕຳແໜ່ງ ງານວຽກຖາວອນ ໃນການດຳເນີນງານ ຂອງໂຮງງານ ພະລັງງານໄຟຟ້າດັ່ງກ່າວ.
ພາຍໃຕ້ສັນຍາດັ່ງກ່າວ, ບໍລິສັດ Convalt Energy ຈະສ້າງຕັ້ງໂຮງໄຟຟ້າ ພະລັງງານແສງຕາເວັນ ຫລາຍແຫ່ງ ທີ່ມີກຳລັງການຜະລິດ ລວມທັງໝົດ 300 ເມກາວັດ ພາຍໃນປີ 2019, ໂດຍໄດ້ຮັບການຊ່ວຍເຫລືອ ຈາກກະຊວງແຜນການ ແລະ ການລົງທຶນ, ກະຊວງພະລັງງານ-ບໍ່ແຮ່ ແລະ ອຳນາດການປົກຄອງແຂວງອັດຕະປື ແລະ ແຂວງບໍລິຄຳໄຊ.
ຂ່າວ: ຫລ້າ, ພາບ: ເກດສະໜາ/ ຂປລ
© ໂຕະນໍ້າຊາ | tonamcha.com
___________
Post a Comment