ສະຫາຍເລຂາຄະນະພັກກະຊວງ ຮສສ ໄດ້ເນັ້ນໜັກໃຫ້ບັນດາສະຫາຍສະມາຊິກພັກໄດ້ຮັບບັດສະມາຊິກພັກຢຶດໝັ້ນຕໍ່ອຸດົມການຂອງພັກ

ໃນໂອກາດເຂົ້າຮ່ວມພິທີມອບບັດສະມາຊິກພັກສົມບູນຊຸດທີ IV ຂອງອົງຄະນະພັກກະຊວງແຮງງານ ແລະ ສະຫວັດດີການສັງຄົມ ( ຮສສ ), ທີ່ໄດ້ຈັດຂື້ນໃນ ວັນທີ 10 ພຶດສະພາ 2018ນີ້, ສະຫາຍ ຄຳແພງ ໄຊສົມແພງ ກຳມະການສູນກາງພັກ, ເລຂາຄະນະພັກກະຊວງ ແຮງງານ ແລະ ສະຫວັດດີການສັງຄົມ, ໄດ້ເນັ້ນໜັກໃຫ້ບັນດາສະຫາຍສະມາຊິກພັກທີ່ໄດ້ຮັບບັດສິມາຊິກພັກທັງໝົດ ຈົ່ງປະຕິບັດດັ່ງນີ້:

1. ຈົ່ງເພີ່ມທະວີ ຮັກສາຄຸນທາດການເມືອງໜັກແໜ້ນ, ຢຶດໝັ້ນຕໍ່ອຸດົມການຂອງພັກ, ເປັນເອກະພາບສູງກັບແນວທາງ, ແຜນນະໂຍບາຍຂອງພັກ, ມີຄວາມຮັບຜິດຊອບສູງ ຕໍ່ໜ້າທີ່ວຽກງານ, ຕັ້ງໜ້າປະຕິບັດມະຕິຄໍາສັ່ງ ແລະ ເຮັດສຳເລັດໜ້າທີ່ການເມືອງທີ່ການຈັດຕັ້ງມອບໝາຍ.

2. ຮັກສາຄຸນສົມບັດສິນທຳປະຕິວັດ, ແບບແຜນດຳລົງຊີວິດ ທີ່ຖືກຕ້ອງ-ບໍລິສຸດປອດໃສ, ເປັນແບບຢ່າງໃນການພັດທະນາຕົນເອງ, ຮັກສາຄວາມສາມັກຄີຮັກແພງເພື່ອນສະຫາຍ ໄດ້ຮັບຄວາມເຊື່ອໝັ້ນໄວ້ວາງໃຈ ຈາກມະຫາຊົນເປັນຢ່າງດີ;

3. ມີສະຕິຕໍ່ການຈັດຕັ້ງ ແລະ ລະບຽບວິໄນເຂັ້ມງວດ, ເປັນເຈົ້າການ ຕື່ນຕົວປະຕິບັດກົດລະບຽບຂອງພັກ, ເຄົາລົບ ແລະ ປະຕິບັດກົດໝາຍຂອງລັດ;

4. ຄະນະພັກແຕ່ລະຂັ້ນ ຈົ່ງພ້ອມກັນເພີ່ມທະວີຄວາມເອົາໃຈໃສ່ ແລະ ຖືການມອບບັດໃຫ້ສະມາຊິກພັກ ເປັນນະໂຍບາຍ ແລະ ເປັນໜ້າທີ່ສຳຄັນໃຈກາງ ຂອງຄະນະພັກແຕ່ລະຂັ້ນ;

5. ຄະນະພັກແຕ່ລະຂັ້ນ ຕ້ອງເປັນເອກະພາບສູງຕໍ່ການຕີລາຄາ ແລະ ເລືອກເຟັ້ນສະມາຊິກພັກ ຜູ້ທີ່ຈະສະເໜີຄະນະພັກຂັ້ນເທິງ ພິຈາລະນາມອບບັດສະມາຊິກພັກໃນແຕ່ລະຄັ້ງ, ສະກັດກັ້ນບໍ່ໃຫ້ກຸ່ມຄົນບໍ່ດີ ສວຍໂອກາດປອມແປງ, ເລັດລອດເຂົ້າໃນຖັນແຖວສະມາຊິກພັກ ແລະ ອົງການຈັດຕັ້ງຂອງພັກແຕ່ລະຂັ້ນ.

6. ຄະນະພັກແຕ່ລະຂັ້ນ ຈົ່ງສືບຕໍ່ເນີນຊີວິດການເມືອງ ຕີລາຄາ ແບ່ງປະເພດ ສະມາຊິກພັກໃຫ້ຖືກຕ້ອງຕາມ ມະຕິ 33 ຂອງກົມການເມືອງສູນກາງພັກ ໃນການອອກບັດ ແລະ ມອບບັດໃຫ້ສະມາຊິກພັກສົມບູນ ຂອງພັກປະຊາຊົນປະຕິວັດລາວ ຢ່າງເຂັ້ມງວດ ເພື່ອສະເໜີຄະນະພັກຂັ້ນເທິງ ພິຈາລະນາ.