ລັດຖະມົນຕີຕ່າງປະເທດ ຕ້ອນຮັບ ທູດການາດາ ປະຈຳ ລາວ ເຂົ້າຢ້ຽມຂໍ່ານັບ
ໃນຕອນເຊົ້າຂອງວັນທີ 14 ມິຖຸນາ 2018, ເວລາ 10:00 ໂມງ, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການຢ້ຽມຂໍ່ານັບ ຂອງ ທ່ານ ນາງ Donica Pottie, ເອກອັກຄະລັດຖະທູດ ແຫ່ງ ການາດາ ປະຈໍາ ສປປ ລາວ, ທີ່ມີສໍານັກງານຕັ້ງຢູ່ ບາງກອກ, ປະເທດໄທ, ໃນໂອກາດເດີນທາງມາຢ້ຽມຢາມ ສປປ ລາວ ແລະ ນໍາພາ ທ່ານ ນາງ Lee-Anne Hermann, ອຸປະທູດການາດາ ປະຈໍາ ຫ້ອງການຕາງໜ້າການທູດ ສປປ ລາວ ທີ່ ນະຄອນຫຼວງວຽງຈັນ, ເພື່ອເຂົ້າຢ້ຽມອໍາລາ ໃນໂອກາດສໍາເລັດການປະຕິບັດໜ້າທີ່ ຢູ່ ສປປ ລາວ.
ໃນໂອກາດດັ່ງກ່າວ, ທ່ານລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງ ຕໍ່ການປະກອບສ່ວນຂອງທ່ານອຸປະທູດ ມາດໍາລົງຕໍາແໜ່ງເປັນນັກການທູດຄົນທໍາອິດ ພາຍຫຼັງເປີດຫ້ອງການຕາງໜ້າການທູດການາດາ ທີ່ ນະຄອນຫຼວງວຽງຈັນ,ເຊິ່ງເປັນນິມິດໝາຍສໍາຄັນ ໃຫ້ແກ່ການຊຸກຍູ້ເພີ່ມທະວີການພົວພັນສອງຝ່າຍ ໃຫ້ໄດ້ຮັບການເສີມຂະຫຍາຍ. ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງ ເຖິງການພົວພັນຮ່ວມມືທັງໃນຂອບສອງຝ່າຍ ແລະ ຫຼາຍຝ່າຍ, ພ້ອມນັ້ນ ກໍ່ໄດ້ປຶກສາຫາລື ແລະ ທົບທວນການພົວພັນ ລະຫວ່າງສອງປະເທດ ທີ່ມີມາແຕ່ດົນນານ ແລະ ປຶກສາຫາລືທິດທາງການເສີມຂະຫຍາຍການພົວພັນ ແລະ ການຮ່ວມມືໃນດ້ານຕ່າງໆ ເປັນຕົ້ນ: ວຽກງານການເກັບກູ້ລະເບີດທີ່ບໍ່ທັນແຕກຢູ່ລາວ, ການສຶກສາ ແລະ ການພົວພັນລະຫວ່າງການາດາ ກັບ ອາຊຽນ, ການຮ່ວມມື ແລະ ການສະໜັບສະໜູນຊຶ່ງກັນ ແລະ ກັນ ໃນເວທີສາກົນ.
ໃນໂອກາດນີ້, ທ່ານທູດ ແລະ ອຸປະທູດການາດາ ປະຈໍາ ລາວ ຍັງໄດ້ເຂົ້າຢ້ຽມຂໍ່ານັບ ທ່ານ ບຸນເກີດ ສັງສົມສັກ, ລັດຖະມົນຕີ ປະຈໍາ ຫ້ອງວ່າການສໍານັກງານນາຍົກ, ທ່ານ ຮສ. ດຣ. ບຸນກອງ ສີຫາວົງ, ລັດຖະມົນຕີກະຊວງສາທາ ລະນະສຸກ, ທ່ານ ສົມມາດ ພົນເສນາ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທ່ານ ປອ. ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ, ແລະ ໄດ້ເດີນທາງໄປແຂວງໆສະຫວັນນະເຂດເຂົ້າຢ້ຽມຂໍ່ານັບ ທ່ານ ສັນຕິພາບ ພົມວິຫານ, ເຈົ້າແຂວງໆສະຫວັນນະເຂດ.
ພາບ ແລະ ຂ່າວ: ກະຊວງການຕ່າງປະເທດ
© ໂຕະນໍ້າຊາ | www.tonamcha.com | www.tonamchanews.com
_______
Post a Comment