ຊຸກຍູ້ເພີ່ມທະວີແກ້ໄຂບັນຫາຊາຍແດນລາວ-ໄທ
ວັນທີ 13 ທັນວາ 2018 ຢູ່ທຳນຽບປະທານປະເທດ ທ່ານ ບຸນຍັງ ວໍລະຈິດ ປະທານປະເທດ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີ ແຫ່ງຣາຊະອານາຈັກໄທ ພ້ອມດ້ວຍຄະນະ ໃນໂອກາດເດີນທາງມາຮ່ວມກອງປະຊຸມຮ່ວມນາຍົກລັດຖະມົນຕີ ແລະ ລັດຖະມົນຕີລາວ-ໄທແບບບໍ່ເປັນທາງການ (JCR) ຄັ້ງທີ 3 ຈັດຂຶ້ນວັນທີ 13-14 ທັນວານີ້ ທີ່ນະຄອນຫຼວງວຽງຈັນ.
ໂອກາດນີ້ ທ່ານ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ແລະ ເຮັດວຽກຢູ່ລາວຂອງທ່ານນາຍົກລັດຖະມົນຕີໄທ ພ້ອມຄະນະຄັ້ງນີ້ ເຊິ່ງເປັນການປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີຖານບ້ານໃກ້ເຮືອນຄຽງ ທີ່ມີມາແຕ່ດົນນານ ໃຫ້ແໜ້ນແຟ້ນຍິ່ງຂຶ້ນ ລາວ ແລະ ໄທ ເປັນປະເທດເພື່ອນບ້ານໃກ້ຄຽງ ທີ່ມີເສັ້ນຊາຍແດນຕິດຈອດກັນທັງທາງບົກ ທາງນ້ຳ ແລະ ທາງອາກາດ ມີຄວາມຜູກພັນທາງດ້ານປະຫວັດສາດ ວັດທະນະທຳຮີດຄອງປະເພນີ ແລະ ພາສາປາກເວົ້າທີ່ຄ້າຍຄືກັນ ອັນນີ້ຖືວ່າເປັນສິ່ງທີ່ພິເສດທີ່ສຸດ ປະຊາຊົນສອງປະເທດມີການໄປມາຫາສູ່ກັນ ແລະ ດຳລົງຊີວີດຢູ່ຮ່ວມກັນດ້ວຍຄວາມສາມັກຄີ ແລະ ເພິ່ງພາອາໄສເຊິ່ງກັນ ແລະ ກັນ ຄວາມຄ້າຍຄືກັນຂອງສອງປະເທດ ບໍ່ສາມາດຕັດແຍກອອກຈາກກັນໄດ້ ນອກຈາກນີ້ ທ່ານປະທານປະເທດ ຍັງໄດ້ສະແດງຄວາມຊົມເຊີຍທີ່ສອງປະເທດ ໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນຢ່າງເປັນປົກກະຕິ ນັບແຕ່ສູນກາງລົງຮອດທ້ອງຖິ່ນ ພ້ອມນີ້ ທ່ານຍັງໄດ້ຊຸກຍູ້ໃຫ້ສືບຕໍ່ເສີມຂະຫຍາຍການໄປມາຫາສູ່ກັນໃນຫຼາຍຂົງເຂດຕື່ມອີກໃນຊຸມປີຕໍ່ໜ້າ ແລະ ສະແດງຄວາມຊົມເຊີຍຕໍ່ຄະນະກຳມາທິການຊາຍແດນຮ່ວມ ແລະ ຄະນະເຈົ້າໜ້າທີ່ອາວຸໂສຂອງສອງຝ່າຍທີ່ມີຄວາມພະຍາຍາມ ຊອກຫາວິທີທາງແກ້ໄຂບັນຫາຊາຍແດນທີ່ຍັງຄົງຄ້າງຮ່ວມກັນ ໂດຍມີຄວາມຄືບໜ້າຕາມລຳດັບໃນການດຳເນີນການສຳຫຼວດ ແລະ ປັກຫຼັກໝາຍຊາຍແດນຮ່ວມກັນ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ດັ່ງນັ້ນ ຈຶ່ງຊຸກຍູ້ໃຫ້ໜ່ວຍງານທີ່ກ່ຽວຂ້ອງສອງຝ່າຍ ເພີ່ມທະວີແກ້ໄຂບັນຫາຊາຍແດນໃຫ້ສຳເລັດຕາມເປົ້າໝາຍ ທີ່ສອງຝ່າຍໄດ້ຕົກລົງຮ່ວມກັນຄື: ຊາຍແດນທາງບົກໃຫ້ສຳເລັດ ປີ 2020 ແລະ ຊາຍແດນທາງນ້ຳໃຫ້ສຳເລັດ ປີ 2021.
ພ້ອມດຽວກັນນັ້ນ ທ່ານປະທານປະເທດ ໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈມາຍັງລັດຖະບານໄທ ໂດຍສະເພາະ ການພັດທະນາພື້ນຖານໂຄງລ່າງໃນໄລຍະຜ່ານມາ ແລະ ຊຸກຍູ້ໃຫ້ລັດຖະບານໄທສືບຕໍ່ຊ່ວຍເຫຼືອ ແລະ ສະໜັບສະໜູນການພັດທະນາພື້ນຖານໂຄງລ່າງຂອງລາວ ເປັນຕົ້ນ ບັນດາເສັ້ນທາງ ຂົວຂ້າມນ້ຳຂອງ ແລະ ໂຄງການອື່ນໆ ເພື່ອໃຫ້ມີການຈັດຕັ້ງປະຕິບັດໂດຍໄວ ເຊິ່ງຈະເປັນການປະກອບສ່ວນອັນສຳຄັນເຂົ້າໃນການເຊື່ອມໂຍງ ເຊື່ອມຈອດ ລະຫວ່າງ ລາວ-ໄທ ແລະ ພາຍໃນອະນຸພາກພື້ນໃຫ້ມີຄວາມສະດວກຍິ່ງຂຶ້ນ.
ຕອນທ້າຍ ທ່ານນາຍົກລັດຖະມົນຕີໄທ ໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບອັນອົບອຸ່ນຂອງທ່ານປະທານປະເທດຄັ້ງນີ້ ພ້ອມທັງຕີລາຄາສູງຕໍ່ການພົວພັນຮ່ວມມືລະຫວ່າງສອງລັດ ແລະ ປະຊາຊົນສອງຊາດລາວ-ໄທ ໃນໄລຍະຜ່ານມາ ທີ່ໄດ້ຮັບການເສີມຂະຫຍາຍໃຫ້ແໜ້ນແຟ້ນຍິ່ງຂຶ້ນ ແລະ ສືບຕໍ່ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ພາບ ແລະ ຂ່າວ: ນສພ ວຽງຈັນໃໝ່
© ໂຕະນໍ້າຊາ | tonamcha.com
___________
Post a Comment