ລັດຖະມົນຕີຕ່າງປະເທດອາຊຽນຖະແຫລງເລື່ອງແຫລມເກົາຫລີ

ມະນິລາ 28 ​ເມສາ: ລັດຖະມົນຕີ​ຕ່າງປະ​ເທດ​ສະມາຄົມ​ປະຊາ​ຊາດ​ອາຊີ​ຕາ​ເວັນ​ອອກສຽງ​ໃຕ້ (ອາ​ຊຽນ) ອອກ​ຖະ​ແຫລ​ງການ​ໃນ​ວັນ​ທີ 28 ​ເມສາ​ນີ້ ສະ​ແດງ​ຄວາມ​ກັງວົນ​ຕໍ່​ສະຖານະ​ການ​ຢູ່​ແຫລມ​ເກົາຫລີ, ​ເຖິງ​ວ່າ ສປປ ​ເກົາຫລີ ຂໍ​ຄວາມ​ສະໜັບສະໜູນ​ຈາກ​ອາ​ຊຽນກໍ​ຕາມ.

ຖະ​ແຫລ​ງການ​ກອງ​ປະຊຸມ​ລັດຖະມົນຕີ​ຕ່າງປະ​ເທດ​ອາ​ຊຽນ ຢູ່​ນະຄອນຫລວງ​ມະນິລາ ຂອງ​ຟີ​ລິບ​ປິນ ລະບຸ​ວ່າ: ອາ​ຊຽນກັງວົນ​ຢ່າງ​ຍິ່ງ​ທີ່​ຄວາມ​ເຄັ່ງ​ຕຶງ​ຢູ່​ແຫລມ​ເກົາຫລີ​ຮຸນ​ແຮງ​ຂຶ້ນ ລວມທັງ​ກໍລະນີ ສປປ ​ເກົາຫລີ ທົດ​ລອງ​ນິວ​ເຄຼຍ 2 ຄັ້ງ​ໃນ​ປີ 2016 ​ແລະ ຍິງ​ລູກ​ສອນ​ໄຟ​ຫລາຍ​ຄັ້ງ, ອາ​ຊຽນ​ເນັ້ນໜັກ​ດີ​ວ່າ: ຄວາມ​ໄຮ້​ສະຖຽນ​ລະ​ພາບ​ຢູ່​ແຫລມ​ເກົາຫລີ​ມີ​ຜົນ​ກະທົບ​ຮ້າຍ​ແຮງຕໍ່​ພາກພື້ນ ​ແລະ ສາກົນ, ລັດຖະມົນຕີ​ຕ່າງປະ​ເທດ​ອາ​ຊຽຈຶ່ງ​ຂໍ​ຮຽກຮ້ອງ​ຢ່າງ​ຈິງ​ຈັງ​ໃຫ້ ສປປ ​ເກົາຫລີ ປະຕິບັດ​ຕາມ​ມະຕິ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ ​ແລະ ກົດໝາຍ​ສາກົນ​ວ່າ​ດ້ວຍ​ການ​ຄວບ​ຄຸມ​ໂຄງການ​ນິວ​ເຄຼຍ. ຂະນະ​ດຽວ​ກັນ, ຂໍ​ໃຫ້​ທຸກ​ຝ່າຍ​ທີ່​ກ່ຽວຂ້ອງ​ຟື້ນການ​ເຈລະຈາ 6 ຝ່າຍ​ທີ່​ຢຸດ​ໄປ​ໃນ​ປີ 2009​, ​ໃຊ້​ຄວາມ​ອົດ​ກັ້ນ​ເພື່ອ​ບັນ​ເທົາ​ຄວາມ​ເຄັ່ງ​ຕຶງ ​ແລະ ງົດ​ການ​ກະທຳ​ໃດໆ​ທີ່​ອາດ​ເຮັດ​ໃຫ້​ສະຖານະ​ການ​ຮ້າຍ​ແຮງ.

ລັດຖະມົນຕີ​ຕ່າງປະ​ເທດ​ອາ​ຊຽນອອກ​ຖະ​ແຫລ​ງການ​ດັ່ງກ່າວ, ​ເຖິງ​ວ່າ​ທ່ານ ຣີ ຍົງ​ໂຮ ລັດຖະມົນຕີ​ຕ່າງປະ​ເທດ ສປປ ​ເກົາຫລີ ສົ່ງ​ໜັງສື​ເຖິງ​ອາ​ຊຽນ ​ແລະ ສຳນັກ​ຂ່າວ AFP ​ໄດ້​ຮັບ​ສຳ​ເນົາ​ໃນ​ວັນ​ທີ 27 ​ເມສາ​ວ່າ: ​ເປັນ​ເທື່ອ​ທຳ​ອິດ​ທີ່ ສປປ ​ເກົາຫລີ ສົ່ງ​ຈົດໝາຍ​ເຖິງ​ອາ​ຊຽນ ​ເພື່ອ​ຂໍ​ການ​ສະໜັບສະໜູນ, ຂໍ​ໃຫ້​ປະທານ​ອາ​ຊຽນ​ແຈ້ງ​ໃຫ້​ກອງ​ປະຊຸມ​ລັດຖະມົນຕີ​ຕ່າງປະ​ເທດ​ຮູ້​ເຖິງ​ສະຖານະ​ການ​ຮ້າຍ​ແຮງ​ຢູ່​ແຫລມ​ເກົາຫລີ ​ແລະ ລິ​ເລີ່​ມຂໍ້​ສະ​ເໜີ​ທີ່​ເໝາະ​ສົມ. ທ່ານ ຣີ ຍົງ​ໄຮ ກ່າວ​ເຖິງ​ການ​ຊ້ອມ​ຮົບ​ລະຫວ່າງ​ອາ​ເມ​ລິ​ກາ ​ແລະ ສ.​ເກົາຫລີ ວ່າ: ​ເປັນ​ເຫດຜົນ​ທີ່​ເຮັດ​ໃຫ້ ສປປ ​ເກົາຫລີ ຕ້ອງ​ພັດທະນາ​ອາວຸດ​ນິວ​ເຄຼຍ, ພ້ອມ​ເຕືອນ​ວ່າ: ສປປ ​ເກົາຫລີ ມີ​ປະສິດທິພາບ​ຈະ​ໃຊ້​ອາວຸດ​ນິວ​ເຄຼຍ​ໂຈມ​ຕີ​ສັດຕູ​ກ່ອນ​ເຊັ່ນ​ດຽວ​ກັນ.

ທີ່ມາ: ຂປລ

-----------------