ລັດຖະບານ ສປປ ລາວ ເອົາໃຈໃສ່ແກ້ໄຂບັນຫາ ລະເບີດບໍ່ທັນແຕກ

ລັດຖະບານ​ ແຫ່ງ ສປປ ລາວ ​ໄດ້​ໃຫ້​ຄວາມ​ສຳຄັນ ​ໃນ​ການ​ແກ້​ໄຂ​ບັນຫາ ​ລະ​ເບີດ​ບໍ່​ທັນ​ແຕກ​, ໂດຍໄດ້​ອອກ​ຄຳ​ສັ່ງ ​ເລກ​ທີ​ 39/ນຍ ລົງ​ວັນ​ທີ 28 ກັນຍາ 2016 ວ່າ​ດ້ວຍການ​ເພີ່​ມທະວີ​ ວຽກ​ງານ​ການ​ແກ້​ໄຂ​ ບັນຫາ​ລະ​ເບີດ​ບໍ່​ທັນ​ແຕກ​ ທີ່​ຕົກ​ຄ້າງ​ ຢູ່ ສປປ ລາວ ​​​ເພື່ອ​ເຮັດ​ໃຫ້ ​ແຕ່​ນີ້​ຮອດ​ປີ 2030 ຮັບປະກັນ​ ໃຫ້​ຈຳນວນ​ຜູ້​ຖືກ​ບາດ​ເຈັບ ​ແລະ ​ເສຍ​ຊີວິດ​ ຈາກ​ລະ​ເບີ​ດບໍ່​ທັນ​ແຕກ​ ໃນ​ແຕ່ລະ​ປີ​ຫລຸດ​ລົງ​ເທື່ອລະ​ກ້າວ​ ຈົນ​ຮອດ​ຈຸດ​ຕ່ຳ​ສຸດ, ຮັບປະກັນ​ໃຫ້​ສຳ​ເລັດ​ ການ​ກວດ​ກູ້​ລະ​ເບີດ​ ບໍ່​ທັນ​ແຕກ​ຕົກ​ຄ້າງ​ ຢູ່​ ບັນດາ​ພື້ນ​ທີ່​ບູລິ​ມະ​ສິດ​ ພັດທະນາ, ບັນດາ​ບ້ານ​ທີ່​ທຸກ​ຍາກ ​ແລະ ຮັບປະກັນ​ໃຫ້​ຜູ້​ລອດ​ຊີວິດ​ ຈາກ​ລະ​ເບີດ​ບໍ່​ທັນ​ແຕກ​ທັງໝົດ ໄດ້​ຮັບ​ການ​ຊ່ວຍ​ເຫລືອ​ ທາງ​ດ້ານ​ການ​ປິ່ນປົວ, ຟື້ນ​ຟູ​ສຸຂະພາບ ​ແລະ ຊ່ວຍ​ເຫລືອ​ຜູ້​ຖືກ​ເຄາະ​ຮ້າຍ​ ຈາກ​ລະ​ເບີດ​ບໍ່​ທັນ​ແຕກ​ ທີ່​ທຸກ​ຍາກ​ໄດ້​ຮັບ​ການ​ ປະກອບ​ອາຊີບ.

ຄະນະ​ກຳມະການ​ຄຸ້ມ​ຄອງ​ແຫ່ງ​ຊາດ ​ເພື່ອ​ການ​ແກ້​ໄຂ​ບັນຫາ ລະ​ເບີດ​ບໍ່​ທັນ​ແຕກ ທີ່​ຕົກ​ຄ້າງຢູ່ ສປປ ລາວ (ຄຊກລ) ​​​ໄດ້ເປີດ​ເຜີຍ​ໃຫ້​ຮູ້​ ເມື່ອ​ບໍ່​ດົນ​ນີ້​ວ່າ: ຕະຫລອດ​ໄລຍະ​ຜ່ານ​ມາ (1996-​7/2016) ​ເນື້ອ​ທີ່ນາ​ຫລາຍ​ກວ່າ 60 ພັນ​ເຮັກຕາ​ ໄດ້​ຮັບ​ການ​ກວດ​ກູ້, ​ໃນ​ນັ້ນ 40 ພັນ​ກວ່າ​ເຮັກຕາ ​ແມ່ນ​ເນື້ອ​ທີ່​ກະສິກຳ, ຫລາຍ​ກວ່າ 20 ພັນ​ເຮັກຕາ ​ແມ່ນ​ເນື້ອ​ທີ່​ພັດທະນາ​ຕ່າງໆ, ລະ​ເບີດ​ບໍ່​ທັນ​ແຕກ ​ຫລາຍ​ກວ່າ 1,7 ລ້ານ​ໜ່ວຍ​ໄດ້​ຖືກ​ທຳລາຍ. ​ໃນ​ນັ້ນ, ມີ​ລະ​ເບີດ​ບົມ​ໃຫຍ່ຫລາຍ​ກວ່າ 7.500 ໜ່ວຍ, ລະ​ເບີດ​ລູກ​ຫວ່ານ 8 ແສນ​ກວ່າ​ໜ່ວຍ, ລະ​ເບີດ​ຝັງ​ດີ​ນ 7 ພັນ​ກວ່າ​ໜ່ວຍ ​ແລະ ລະ​ເບີດ​ຊະນິດ​ອື່ນໆ 9 ​ແສນ​ກວ່າ​ໜ່ວຍ.

ສປປ ລາວ ​ເປັນ​ປະ​ເທດ​ທີ່​ຖືກ​ ຖິ້ມ​ລະ​ເບີດ​ທາງ​ອາກາດ ຢ່າງ​ໜັກໜ່ວງ​ທີ່​ສຸດ​ ໃນ​ໄລຍະ​ສົງຄາມ​ອິນດູຈີນ ​ໃນ​ປີ 1964-1973, ມີ​ລະ​ເບີດ​ຖືກ​ຖີ້ມລົງ​ໃສ່ ​ແຜນ​ດິນລາວ ຫລາຍ​ກວ່າ 2 ລ້ານ​ໂຕນ, ​ໃນ​ນັ້ນ ສ່ວນ​ຫລາຍ​ແມ່ນ​ ລະ​ເບີດ​ລູກ​ຫວ່ານ (ບົມບີ) ລະ​ເບີດ​ດັ່ງກ່າວ​, ມີ​ປະມານ 270 ລ້ານ​ໜ່ວຍ ​ແລະ ຍັງ​ມີຈຳນວນ​ຫລາຍ ​ທີ່​ຍັງ​ບໍ່​ທັນ​ແຕກ, ນັກວິຊາການ​​ ຄາດ​ວ່າປະມານ 30% ​ແມ່ນ​ຍັງ​ບໍ່​ທັນ​ແຕກ ໝາຍຄວາມ​ວ່າ​ຍັງ​ມີ​ລະ​ເບີດ​ລູກ​ຫວ່ານ ປະມານ 80 ລ້ານ​ໜ່ວຍ ທີ່​ຍັງ​ຕົກ​ຄ້າງ ​ແລະ ຢັ່ງຢາຍ​ຢູ່​ຕາມ​ພື້ນ​ທີ່​ຕ່າງໆ ຢ່າງ​ກວ້າງຂວາງ.

​ຂ່າວ : ສຸກ​ສະຫວັນ 

© ໂຕະນໍ້າຊາ | tonamcha.com  

___________