ພະແນກຕຳຫຼວດຈະລາຈອນ ນະຄອນຫຼວງວຽງຈັນ ກຽມກຳລັງ 600 ຄົນ ລະບາຍການສັນຈອນມື້ເປີດສົກຮຽນໃໝ່
ອີງຕາມການລາຍງານຂອງ ນສພ ວຽງຈັນໃຫມ່ ວ່າ: ເພື່ອເຮັດໃຫ້ການເປີດສົກຮຽນໃໝ່ ສົກປີ 2018-2019 ທົ່ວນະຄອນຫຼວງວຽງຈັນ ມີຄວາມສະຫງົບປອດໄພ ແລະ ການສັນຈອນມີຄວາມສະດວກຄ່ອງຕົວ ບໍ່ແອອັດ ແລະ ເພື່ອຫຼີກເວັ້ນບໍ່ໃຫ້ມີອຸບັດຕິເຫດເກີດຂຶ້ນນັ້ນ ພະແນກຕຳຫຼວດຈະລາຈອນ ນະຄອນຫຼວງວຽງຈັນ ໄດ້ວາງກຳລັງເຈົ້າໜ້າທີ່ປະມານ 600 ຄົນ ເຂົ້າປະຈຳການໃນຈຸດຕ່າງໆທີ່ມີໂຮງຮຽນ ແລະ ສະຖາບັນການສຶກສາ.
ທ່ານພັນໂທ ເພັງສະຫວັນ ທຳມະບຸນ ຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ: ໄລຍະເປີດສົກຮຽນໃໝ່ນີ້ ເຈົ້າໜ້າທີ່ຕຳຫຼວດຈະລາຈອນຈະເພີ່ມທະວີການປະຕິບັດໜ້າທີ່ ໂດຍສະເພາະ ແມ່ນການຈັດກຳລັງລົງລະບາຍການສັນຈອນຕາມຖະໜົນໃນຊົ່ວໂມງເລັ່ງດ່ວນ ຕາມແຕ່ລະຈຸດ ແລະ ບ່ອນໂຮງຮຽນທີ່ແອອັດ ພ້ອມນັ້ນ ກໍ່ຈະເພີ່ມທະວີມາດຕະການແກ້ໄຂກຸ່ມແກ້ງກວນເມືອງ ໂດຍສົມທົບກັບຕຳຫຼວດກອງພັນເຄື່ອນທີ່ນະຄອນຫຼວງວຽງຈັນ ການສະກັດກັ້ນອຸບັດຕິເຫດ ແລະ ກວດການັກຂັບຂີ່ທີ່ດື່ມສິ່ງມືນເມົາ ແລະ ຖ້າຫາກພົບເຫັນຜູ້ລະເມີດກົດຈະລາຈອນແມ່ນຈະມີການປັບໃໝ ແລະ ດຳເນີນຕາມລະບຽບກົດໝາຍ.
ປັດຈຸບັນ ເຫັນວ່າສະພາບການສັນຈອນມີຄວາມແອອັດ ໂດຍສະເພາະ ໃນຊົ່ວໂມງເລັ່ງດ່ວນ ບວກໃສ່ນັກຂັບຂີ່ຈຳນວນໜຶ່ງບໍ່ປະຕິບັດກົດລະບຽບ ຈອດລົດຊະຊາຍ ແລະ ອື່ນໆ ເຊິ່ງເຮັດໃຫ້ການສັນຈອນມີຄວາມຫຍຸ້ງຍາກ ແລະ ບາງເສັ້ນທາງມີລົດຕິດແກ່ຍາວ ຜ່ານມາເຈົ້າໜ້າທີ່ກໍ່ໄດ້ຈັດສັນກຳລັງລົງລະບາຍການສັນຈອນ ແຕ່ກໍ່ຍັງບໍ່ທັນໄດ້ທົ່ວເຖິງ ສະນັ້ນ ສະພາບການສັນຈອນໃນໄລຍະເປີດສົກຮຽນໃໝ່ນີ້ ຍິ່ງຈະເຮັດໃຫ້ມີລົດຕິດແອອັດ ທາງເຈົ້າໜ້າທີ່ພວກເຮົາຈຶ່ງໄດ້ມີການເພີ່ມທະວີ, ໂດຍຈັດກຳລັງປະມານ 600 ຄົນ ລົງປະຈຳຕາມຈຸດຕ່າງໆທີ່ມີໂຮງຮຽນ ແລະ ສະຖາບັນການສຶກສາ.
ທີ່ມາ: ນສພ ວຽງຈັນໃຫມ່
________
Post a Comment