ນາຍົກລັດຖະມົນຕີແຫ່ງ ສປປ ລາວ ເຂົ້າຮ່ວມພິທີເປີດກອງປະຊຸມປະຈຳປີຂອງກອງທຶນການເງິນສາກົນ ແລະ ກຸ່ມທະນາຄານໂລກ
ໃນຕອນເຊົ້າຂອງວັນທີ 12 ຕຸລາ 2018, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ ໄດ້ສືບຕໍ່ເຄື່ອນໄຫວເຂົ້າຮ່ວມເປັນແຂກກິດຕິມະສັກ ໃນພິທີເປີດກອງປະຊຸມປະຈຳປີກອງທຶນການເງິນສາກົນ ແລະ ກຸ່ມທະນາຄານໂລກ ປະຈຳປີ 2018, ທີ່ ບາຫລີ, ອິນໂດເນເຊຍ, ຕາມຄຳເຊີນຂອງ ຜູ້ອຳນວຍການໃຫຍ່ກອງທຶນການເງິນສາກົນ, ປະທານກຸ່ມທະນາຄານໂລກ ແລະ ລັດຖະມົນຕີການເງິນ, ປະເທດຟິນແລນ ໃນນາມປະທານກອງປະຊຸມປະຈຳປີຂອງກອງທຶນການເງິນສາກົນ ແລະ ກຸ່ມທະນາຄານໂລກ, ໂດຍການເຂົ້າຮ່ວມຂອງບັນດາຜູ້ນຳອາຊຽນ, ບັນດາລັດຖະມົນຕີການເງິນ, ຜູ້ວ່າທະນາຄານກາງ, ລັດຖະມົນຕີທີ່ຮັບຜິດຊອບວຽກງານການພັດທະນາ, ພາກທຸລະກິດ, ຕົວແທນຈາກອົງການສັງຄົມພົນລະເຮືອນ ແລະ ນັກຄົ້ນຄວ້າ ຈຳນວນ 3000 ກວ່າຄົນ, ເຊິ່ງເປັນຜູ້ແທນຈາກ 189 ປະເທດ ເຂົ້າຮ່ວມ.
ໃນກອງປະຊມຄັ້ງນີ້, ຜູ້ອຳນວຍການໃຫຍ່ກອງທຶນການເງິນສາກົນ ແລະ ປະທານທະນາຄານໂລກ ໄດ້ລາຍງານສະພາບການພັດທະນາເສດຖະກິດຂອງໂລກ ພ້ອມທັງແລກປ່ຽນທັດສະນະທາງດ້ານນະໂຍບາຍ ແລະ ທິດທາງຂອງສອງອົງກອນໃນຕໍ່ໜ້າ ໃນການຈັດຕັ້ງປະຕິບັດໜ້າທີ່ຂອງຕົນ ໃນການຮັກສາສະຖຽນລະພາບທາງດ້ານການເງິນ ແລະ ເສດຖະກິດຂອງໂລກ.
ກອງປະຊຸມປະຈຳປີຂອງກອງທຶນສາກົນ ແລະ ກຸ່ມທະນາຄານໂລກຄັ້ງນີ້ ຈະໄດ້ມີການປຶກສາຫາລືບັນຫາຕ່າງໆຂອງພາກພື້ນ ແລະ ໃນໂລກ, ລວມທັງການຄາດຄະເນສດຖະກິດໂລກ, ການຮັກສາສະຖຽນລະພາບ ທາງດ້ານເສດຖະກິດຂອງໂລກ, ການຫຼຸດຜ່ອນຄວາມທຸກຍາກ, ການສ້າງວຽກເຮັດງານທຳ ແລະ ການຂະຫຍາຍຕົວທາງດ້ານເສດຖະກິດ, ການພັດທະນາທາງດ້ານເສດຖະກິດ ກໍ່ຄືການປ່ຽນແປງຂອງສະພາບດິນຟ້າອາກາດ.
ທີ່ມາ: ກະຊວງການຕ່າງປະເທດ
© ໂຕະນໍ້າຊາ | www.tonamcha.com
_____
Post a Comment