ອາຊຽນ-ອາເມຣິກາ ເພີ່ມທະວີການຮ່ວມມືສົ່ງເສີມສັນຕິພາບ
ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ສ ອາເມຣິກາ ກັບທ່ານ John J Sullivan ຮອງລັດຖະມົນຕີກະຊວງການຕ່າງປະເທດ ສ ອາເມຣິກາ ວັນທີ 27 ກັນຍາ 2018 ຢູ່ນິວຢອກ ສ ອາເມຣິກາ ເຊິ່ງເປັນກອງປະຊຸມຄັ້ງທຳອິດ ພາຍຫຼັງທີ່ລາວໄດ້ຮັບໜ້າທີ່ເປັນປະເທດປະສານງານ ສຳລັບການພົວພັນອາຊຽນ-ສ ອາເມຣິກາ ສົກປີ 2018-2021.
ກອງປະຊຸມຄັ້ງນີ້ ໄດ້ແລກປ່ຽນຄຳຄິດຄຳເຫັນ ເພື່ອຮັດແໜ້ນການພົວພັນຮ່ວມມືລະຫວ່າງອາຊຽນ ແລະ ສ ອາເມຣິກາໃນຕໍ່ໜ້າ ໃນນີ້ ສ ອາເມຣິກາ ຢ້ຳຄືນຍຸດທະສາດອິນໂດ-ປາຊີຟິກຂອງຕົນ ແນໃສ່ຮ່ວມມືກັບບັນດາປະເທດໃນພາກພື້ນ ບົນພື້ນຖານຫຼັກການເສລີ ເປີດກວ້າງ ແລະ ເຄົາລົບຄວາມເປັນລະບຽບ ບົນພື້ນຖານຫຼັກການຕ່າງໆ ເພື່ອສົ່ງເສີມການພັດທະນາແບບຍືນຍົງ ຕໍ່ບັນຫານີ້ປະເທດສະມາຊິກອາຊຽນເນັ້ນໜັກ ການເຄົາລົບຕໍ່ຄວາມເປັນແກນກາງຂອງອາຊຽນ ແລະ ຍຸດທະສາດດັ່ງກ່າວຂອງ ສ ອາເມຣິກາ ຕ້ອງເສີມສ້າງໃຫ້ບັນດາກົນໄກຕ່າງໆ ທີ່ມີຢູ່ແນໃສ່ປົກປັກຮັກສາ ແລະ ສົ່ງເສີມສັນຕິພາບ ສະຖຽນລະພາບ ແລະ ຄວາມຮັ່ງມີຜາສຸກຮ່ວມກັນ ເຫັນດີເພີ່ມທະວີການຮ່ວມມືລະຫວ່າງ ອາຊຽນ ແລະ ສ ອາເມຣິກາ ໃນຂົງເຂດທີ່ສອງຝ່າຍມີທ່າແຮງ ເຊັ່ນ: ດ້ານການຄ້າ ແລະ ການລົງທຶນ ເສດຖະກິດດີຈີຕອນ ການຄ້າທາງເອເລັກໂຕຣນິກ ການເຊື່ອມຈອດ ແລະ ການສົ່ງເສີມການຄ້າ ແລະ ການລົງທຶນ ລວມທັງມາດຕະການສົ່ງເສີມຈຸລະວິສາຫະກິດ ວິສາຫະກິດຂະໜາດນ້ອຍ ແລະ ຂະໜາດກາງ ເພື່ອໃຫ້ມີຄວາມເຂັ້ມແຂງ ແລະ ທັນສະໄໝໃນຍຸກການປະຕິວັດອຸດສາຫະກຳ 4.0 ແລະ ຍຸກເສດຖະກິດດີຈີຕອນ.
ພ້ອມນີ້ ກອງປະຊຸມຍັງໄດ້ປຶກສາຫາລືກ່ຽວກັບການກະກຽມໃຫ້ກອງປະຊຸມສຸດຍອດອາຊຽນ-ສ ອາເມຣິກາ ເຊິ່ງຈະຈັດຂຶ້ນເດືອນພະຈິກ 2018 ຢູ່ປະເທດສິງກະໂປ ແລກປ່ຽນຄຳຄິດຄຳເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເຊັ່ນ: ສະພາບການໃນແຫຼມເກົາຫຼີ ສະພາບການຢູ່ທະເລຈີນໃຕ້ ແລະ ສະພາບການຢູ່ຕາເວັນອອກກາງ.
ທ່ານ ສະເຫຼີມໄຊ ກົມມະສິດ ໄດ້ຢ້ຳຄືນຄວາມໝາຍໝັ້ນຂອງລາວ ທີ່ຈະເຮັດວຽກຮ່ວມກັບປະເທດສະມາຊິກອາຊຽນ ແລະ ສ ອາເມຣິກາ ເພື່ອຮັດແໜ້ນການຮ່ວມມືອາຊຽນ-ສ ອາເມຣິກາ ໃນໄລຍະທີ່ລາວເປັນປະເທດປະສານງານຕະຫຼອດ 3 ປີຂ້າງໜ້າ
ຂ່າວ: ນສພ ວຽງຈັນໃຫ່ມ
© ໂຕະນໍ້າຊາຂ່າວ | www.tonamcha.com
____
Post a Comment