ໂຄງການກໍ່ສ້າງເສັ້ນທາງລົດໄຟ ລາວ-ຈີນ ຄືບໜ້າແລ້ວ 55.69%

ກອງ​ປະຊຸມ​ສາມັນ​ຄົບ​ຄະນະ​ພັກ ກະຊວງ​ໂຍທາ​ທິ​ການ ແລະ ຂົນສົ່ງ (ຍທຂ) ຄັ້ງ​ທີ 14 ສະໄໝ​ທີ IV (ເປີດ​ກວ້າງ) ຈັດ​ຂຶ້ນ​ວັນ​ທີ 31 ມັງກອນ-1 ກຸມພາ 2019 ຢູ່​ກະຊວງ ຍທຂ ໂດຍ​ເປັນ​ປະທານ​ຂອງ​ສະຫາຍ ບຸນ​ຈັນ ສິນ​ທະ​ວົງ ກຳມະການ​ສູນ​ກາງ​ພັກ ເລຂາ​ຄະນະ​ພັກ ລັດຖະມົນຕີ​ກະຊວງ ຍທຂ ມີ​ຄະນະ​ປະຈຳ​ພັກ ຮອງ​ລັດຖະມົນຕີ ຫົວໜ້າ​ກົມ ສະ​ຖາ​ບັນ ແລະ ຂະແໜງການ​ກ່ຽວຂ້ອງ​ເຂົ້າ​ຮ່ວມ.

ສະຫາຍ ລັດຕະນະມະນີ ຄູນ​ນີ​ວົງ ຮອງ​ເລຂາ​ຄະນະ​ພັກ ຮອງ​ລັດຖະມົນຕີ​ກະຊວງ ຍທຂ ກ່າວ​ວ່າ: 1 ປີຜ່ານມາ ຄະນະ​ພັກ​ກະຊວງ ຍທຂ ໄດ້​ເອົາໃຈໃສ່​ຊີ້​ນຳນຳພາ​ຂະແໜງການ​ກ່ຽວຂ້ອງ ຈັດ​ຕັ້ງ​ປະຕິບັດ​ແຜນ​ວຽກ​ຈຸດ​ສຸມ​ຂອງ​ລັດຖະບານ ໃນ​ຂະແໜງການ​ວິຊາ​ສະເພາະ​ແຕ່​ລະ​ດ້ານ ເປັນຕົ້ນ ວຽກ​ງານ​ຂົວ​ທາງ ໄດ້​ສຳເລັດ​ການ​ປັບປຸງ ແລະ ກໍ່ສ້າງ​ເສັ້ນທາງ​ຫາ​ເຂດ​ຈຸດ​ສຸມ​ຂອງ​ລັດຖະບານ​ຫຼາຍ​ໂຄງການ ເຊັ່ນ: ໂຄງການ​ກໍ່ສ້າງ​ເສັ້ນທາງ​ແຕ່​ເມືອງ​ອະນຸວົງເມືອງ​ທ່າ​ໂທມ ເສັ້ນທາງ​ແຕ່​ພູ​ຫົວ​ຊ້າງ-ອ່າວ​ໃຕ້ ເມືອງ​ອະນຸວົງ ແຂວງ​ໄຊ​ສົມບູນ, ໂຄງການ​ກໍ່ສ້າງ​ຂົວ​ຂ້າມ​ນໍ້າເຊ​ກອງ, ໂຄງການ​ຟື້ນ​ຟູ​ທາງ​ເລກ 9 ສັນຍາ 2, ໂຄງການ​ຂົວ​ນໍ້າຍອນ-ບ້ານ​ລ່ອງ​ແຈ້ງ ປະຕິບັດ​ໄດ້ 87.31%, ໂຄງການ​ກໍ່ສ້າງ​ເສັ້ນທາງ​ບ້ານ​ນາ​ນົກ​ຂຸ້ມ ເມືອງ​ທຸລະຄົມບ້ານ​ນາ​ໄຊ ເມືອງ​ປາກ​ງື່ມ ປະຕິບັດ​ໄດ້ 91.25%, ໂຄງການ​ກໍ່ສ້າງ​ທາງ​ຫົງ​ສາ-ຊຽງ​ແມນ ໄລຍະ 1 ປະຕິບັດ​ໄດ້ 86% ໄລຍະ 2 ປະຕິບັດ 91%, ໂຄງການ​ກໍ່ສ້າງ​ທາງ 6A ຫາງ​ລ້ອງ-ສົບ​ເບົາ ປະຕິບັດ​ໄດ້ 98%, ໂຄງການ​ກໍ່ສ້າງ​ທາງ​ຊຳ​ໃຕ້-ທ່າ​ເຫຼົ້າ ປະຕິບັດ 96%, ແລະ ໂຄງການ​ກໍ່ສ້າງ​ທາງ​ແຕ່​ສາມ​ແຍກ​ນາ​ຊາງ-ທົ່ງ​ທູ້ ປະຕິບັດ​ໄດ້ 98%. ນອກ​ນີ້ ຍັງ​ມີ​ໂຄງການ​ອື່ນໆ​ທີ່​ກຳລັງ​ຈັດ​ຕັ້ງ​ປະຕິບັດ​ຢ່າງ​ຕັ້ງໜ້າ.

ສຳລັບ​ໂຄງການ​ກໍ່ສ້າງ​ທາງ​ລົດໄຟ​ລາວ-ຈີນ (ບໍ່​ເຕັນ-ນະຄອນຫຼວງ​ວຽງ​ຈັນ) ປັດຈຸບັນ​ມີ​ຄວາມ​ຄືບ​ໜ້າ 55.69% ໃນ​ນີ້ ໄດ້​ເຈາະ 69 ອຸ​ໂມງ ສາມາດ​ຊີ​ເຈາະ​ໄດ້ 126,544 ແມັດ, ກໍ່ສ້າງ​ຂົວ 143 ແຫ່ງ ຊີ​ເຈາະ​ເຂັມ​ເສົາ​ຂົວ 213,041 ແມັດ. ສະເພາະ​ການ​ຊົດ​ເຊີຍ​ສິ່ງ​ກີດຂວາງ​ບັນດາ​ແຂວງ ໄດ້​ຄົ້ນຄວ້າ​ລາຄາ​ຫົວໜ່ວຍ​ຄ່າ​ຊົດ​ເຊີຍ​ສິ່ງ​ກີດຂວາງ​ຕາມ 8 ຂັ້ນ​ຕອນ. ປັດຈຸບັນ, ການ​ໄກ່​ເກ່ຍ​ຊົດ​ເຊີຍ​ໃຫ້​ຜູ້​ຖືກ​ຜົນ​ກະທົບ 8 ຄັ້ງ ມູນ​ຄ່າ 851.53 ຕື້​ກີບ. ພ້ອມ​ນີ້, ຍັງ​ໄດ້​ດຳເນີນ​ການ​ສຳ​ຫຼວດ​ໂຄງການ​ກໍ່ສ້າງ​ເສັ້ນທາງ​ລົດໄຟ​ເຊື່ອມ​ຕໍ່ ລາວ-ໄທ ໄລຍະ II (ຕອນ2) ເພື່ອ​ຂຶ້ນ​ແຜນ​ງົບປະມານ​ຊົດ​ເຊີຍ​ສິ່ງ​ກີດ­ຂວາງ​ປະຕິບັດ​ໄດ້ 95%, ສຳເລັດ​ການ​ປະມູນ​ວ່າ​ຈ້າງ​ບໍລິສັດ​ທີ່​ປືກ​ສາ​ໂຄງການ, ສຶກ​ສາ​ຄວາມ​ເປັນ​ໄປ​ໄດ້​ທາງ​ລົດໄຟ​ແຕ່​ນະຄອນຫຼວງ​ວຽງ​ຈັນ-ທ່າ​ແຂກ-ມູ​ຢ່າ-ຫວຸງ​ອ່າງ ສສ ຫວຽດນາມ.

ສຳລັບ​ແຜນ​ວຽກ​ຈຸດ​ສຸມ​ປີ 2019 ຈະ​ສືບຕໍ່​ສ້າງ ແລະ ຟື້ນ​ຟູ​ສ້ອມແປງ​ເສັ້ນທາງ​ສາຍ​ຫຼັກ​ຕ່າງໆ​ເຊັ່ນ: ເສັ້ນທາງ​ຫຼວງ​ແຫ່ງ​ຊາດ, ເສັ້ນທາງ​ຍຸດ​ທະ​ສາດ​ເຊື່ອມ​ຕໍ່​ພາຍ​ໃນ, ທາງ​ຮັບ​ໃຊ້​ການ​ຜະລິດ, ທາງ​ວຽກ​ງານ​ປ້ອງ​ກັນ​ຊາດປ້ອງ​ກັນ​ຄວາມ​ສະຫງົບ, ແລະ ເສັ້ນທາງ​ເຂົ້າ​ຫາ​ເຂດ​ຈຸດ​ສຸມ​ພັດທະນາ. ສືບຕໍ່​ນຳພາ​ຊຸກຍູ້​ບັນດາ​ໂຄງການ​ກໍ່ສ້າງ​ຂົວທາງ​ໃຫ້​ສຳເລັດ​ຕາມ​ແຜນ ແລະ ສືບຕໍ່​ຊຸກຍູ້​ການ​ກໍ່ສ້າງ​ເສັ້ນທາງ​ລົດໄຟ​ໃຫ້​ສຳເລັດ​ຕາມ​ແຜນການ ເພື່ອ​ແນໃສ່​ເຮັດ​ໃຫ້​ພື້ນຖານ​ໂຄງ​ລ່າງ​ໄດ້​ຮັບ​ການ​ຍົກ​ລະດັບ ແລະ ພັດທະນາ​ດີ​ຂຶ້ນ​ເປັນ​ກ້າວໆ.

ຂໍ້ມູນ : ໜັງສືພິມ ວຽງຈັນໃໝ່ | Photo: news.cn 

© ໂຕະນໍ້າຊາ | tonamcha.com
___________