ການກໍ່ສ້າງເສັ້ນທາງຊັກຊ້າ ຍັງເປັນບັນຫາທີ່ປະຊາຊົນ ສະເໜີໃຫ້ພາກສ່ວນກ່ຽວຂ້ອງເລັ່ງແກ້ໄຂ
ການພົບປະກັບປະຊາຊົນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສຊ ສສ ນວ) ນຳໂດຍທ່ານ ພັນເອກ ບົວເງິນ ຫົງໄຂຄຳ ສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ 1 ສສ ນວ ຮອງຫົວໜ້າກອງບັນຊາການທະຫານ ນວ ທ່ານ ສຸກສະຫວັນ ບຸດຕະວົງ ສສ ນວ ແລະ ທ່ານ ທອງສະຫວັນ ມີບຸນ ສສ ນວ ໃນວັນທີ 22 ກຸມພາ 2019 ທີ່ວັດບ້ານໜອງໄຮ ເມືອງຫາດຊາຍຟອງ ແລະ ສະຖາບັນການເງິນດົງຄຳຊ້າງ ເຊິ່ງປະຊາຊົນ ແລະ ຄູ-ອາຈານ ຕະຫຼອດຮອດນັກສຶກສາ ໄດ້ສະເໜີຫຼາຍບັນຫາເພື່ອໃຫ້ ສສຊ ແລະ ສສ ນວ ຮັບຊາບ ແລະ ນຳໄປພິຈາລະນາແກ້ໄຂກັບພາກສ່ວນກ່ຽວຂ້ອງ ໃນນັ້ນ ບັນຫາການກໍ່ສ້າງເສັ້ນທາງຊັກຊ້າ ຍັງເປັນບັນຫາຕົ້ນໆທີ່ຖືກສະເໜີໃຫ້ແກ້ໄຂຮີບດ່ວນ.
ນອກຈາກການເຜີຍແຜ່ຜົນສຳເລັດກອງປະຊຸມສະໄມສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນວ ຊຸດທີ 1 ແລ້ວ ຜູ້ເຂົ້າຮ່ວມຍັງໄດ້ຮັບຟັງສະພາບລວມ ການພັດທະນາເສດຖະກິດ-ສັງຄົມຂອງບ້ານ ພ້ອມກັບຮັບຟັງຄຳສະເໜີບັນຫາຕ່າງໆ ເພື່ອໃຫ້ຂັ້ນເທິງຊອກຫາວິທີແກ້ໄຂ ເປັນຕົ້ນ ບັນຫາຄົນຕ່າງດ້າວທີ່ມາອາໄສຢູ່ບ້ານໜອງໄຮບໍ່ຖືກຕ້ອງ ປະກອບອາຊີບ (ນາງສາວບໍລິການ) ຜິດລະບຽບກົດໝາຍໃຫ້ພາກສ່ວນກ່ຽວຂ້ອງ ເລັ່ງກວດກາແກ້ໄຂ ຄຽງຄູ່ກັບການປະຕິບັດລະບຽບກົດໝາຍຢ່າງເຂັ້ມງວດ ບັນຫານັກຮຽນນັກສຶກສາຈົບໃໝ່ບໍ່ມີວຽກເຮັດ ສະເໜີໃຫ້ພາກສ່ວນກ່ຽວຂ້ອງ ກໍ່ຄື ລັດຖະບານຊອກຫາວິທີທາງແກ້ໄຂໃຫ້ເປັນຮູບປະທຳຍິ່ງຂຶ້ນ ບັນຫາຄ່ານໍ້າ ຄ່າໄຟຟ້າ ຕະຫຼອດເຖິງຄ່າບໍລິການປ່ຽນກົງເຕີທີ່ເຫັນວ່າມີລາຄາແພງ ແຕ່ເງິນເດືອນໜ້ອຍບໍ່ພໍຈ່າຍ ການແກ້ໄຂບັນຫາສະໜາມກັອບທີ່ຕັ້ງຕິດກັບສະຖານທີ່ອາໄສຂອງປະຊາຊົນ ໂດຍສະເພາະ ບັນຫາລູກກ໊ອຟຕົກມາໃສ່ສະຖານທີ່ບຸກຄົນ ບັນຫາການເກີດອຸບັດເຫດຕາມຖະໜົນ ຢາກໃຫ້ພາກສ່ວນກ່ຽວຂ້ອງສົມທົບກັບອຳນາດການປົກຄອງບ້ານ ພ້ອມກັນແກ້ໄຂຮ່ວມກັນ ປຸກລະດົມສ້າງຈິດສຳນຶກໃຫ້ຜູ້ຂັບຂີ່ ໂດຍສະເພາະ ບັນຫາດື່ມສິ່ງມຶນເມົາແລ້ວຂັບຂີ່ ເຊິ່ງເຮັດໃຫ້ເກີດອຸບັດເຫດຫຼາຍທີ່ສຸດ ບັນຫາການແກ້ໄຂຮ່ອງລະບາຍນໍ້າຂ້າງທາງ ທີ່ເຫັນວ່າຝົນຕົກແຮງແມ່ນເກີດສະພາບນ້ຳຖ້ວມທັນທີ ແລະ ທີ່ປະຊາຊົນຮຽກຮ້ອງໃຫ້ພາກສ່ວນກ່ຽວຂ້ອງພ້ອມກັນແກ້ໄຂເລັ່ງດ່ວນ ແລະ ຫຼາຍທີ່ສຸດ ແມ່ນການຈັດຕັ້ງປະຕິບັດໂຄງການກໍ່ສ້າງເສັ້ນທາງແຕ່ 4 ແຍກໄຟແດງໜອງໄຮ-ບ້ານສົມສະໜຸກ ໂດຍປະຊາຊົນສະເໜີໃຫ້ພາກສ່ວນກ່ຽວຂ້ອງ ຕິດຕາມຢ່າງໃກ້ຊິດ ເພື່ອເຮັດໃຫ້ໂຄງການມີຄຸນນະພາບ ແລະ ສຳເລັດຕາມແຜນການວາງໄວ້ . ພາບ-ຂ່າວ: ນສພ ວຽງຈັນໃຫ່ມ
___________
Post a Comment