ສານຂອງທ່ານ ນາຍົກລັດຖະມົນຕີ ທອງລຸນ ສີສຸລິດ ເນື່ອງໃນ ໂອກາດວັນສາກົນ ຕ້ານຢາເສບຕິດ ວັນທີ 26 ມິຖຸນາ 2017
ໃນທ່າມກາງທີ່ທົ່ວພັກ, ທົ່ວລັດ ແລະ ທົ່ວງປວງຊົນລາວ ພວມຫ້າວຫັນຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ VIII ຢ່າງຟົດຟື້ນນັ້ນ, ພວກເຮົາຈະໄດ້ພ້ອມກັນ ກັບປະຊາຊາດໃນທົ່ວໂລກ ສະເຫລີມສະຫລອງ ວັນສາກົນຕ້ານຢາເສບຕິດ ຄົບຮອບ 30 ປີ ວັນທີ 26 ມິຖຸນາ 2017 ເຊິ່ງຖືເປັນໂອກາດ ແຫ່ງການສະເໜີຜົນງານ ໃນການຕໍ່ສູ້ເພື່ອສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດທີ່ ພັກ-ລັດ ແລະ ປະຊາຊົນລາວ ບັນດາເຜົ່າ ໄດ້ດຳເນີນໃນໄລຍະ 1 ປີຜ່ານມາ ແລະ ສະເໜີທິດທາງເພື່ອ ຈັດຕັ້ງປະຕິບັດ ໃນຊຸມປີຕໍ່ໜ້າ.
ເປັນທີ່ຊາບນຳກັນແລ້ວວ່າ: ຢາເສບຕິດແມ່ນ ບັນຫາກວມລວມຂອງໂລກ ທີ່ເປັນໄພອັນຕະລາຍ ຕໍ່ມວນມະນຸດ, ເປັນບໍ່ເກີດແຫ່ງການ ກໍ່ອາຊະຍາກຳ, ການສໍ້ລາດບັງຫລວງ, ກົດໜ່ວງທ່ວງດຶງ ການສ້າງສາພັດທະນາ ເສດຖະກິດ-ສັງຄົມ ຂອງຊາດ ທັງສ້າງຄວາມເສຍຫາຍ ຢ່າງໃຫຍ່ຫລວງຕໍ່ບຸກຄົນ ແລະ ຄອບຄົວ ຜູ້ຕົກເປັນທາດຂອງມັນ.
ຍ້ອນແນວນັ້ນ, ໃນຊຸມປີຜ່ານມາ ຈົນເຖິງປັດຈຸບັນ, ພັກ ແລະ ລັດຖະບານເຮົາ ຈຶ່ງໄດ້ຖືເອົາການ ສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ເປັນໜ້າທີ່ສຳຄັນ ແລະ ໄດ້ຊີ້ນຳ-ນຳພາ ການຈັດຕັ້ງປະຕິບັດ ວຽກງານດັ່ງກ່າວຢ່າງຈົດຈໍ່ ແລະ ຈິງຈັງຕະຫລອດມາ. ພວກເຮົາໄດ້ເອົາໃຈໃສ່ ສຶກສາອົບຮົມ ໃຫ້ປະຊາຊົນບັນດາຊັ້ນຄົນ ເປັນຕົ້ນຊາວໜຸ່ມ-ເຍົາວະຊົນ ໄດ້ຮັບຮູ້-ເຂົ້າໃຈ ຢ່າງຖືກຕ້ອງກ່ຽວກັບພິດໄພ ແລະ ຜົນຮ້າຍຂອງຢາເສບຕິດ, ໄດ້ໂຄສະນາເຜີຍແຜ່ ແນວທາງນະໂຍບາຍ, ກົດໝາຍ, ລະບຽບການ ແລະ ມະຕິຄຳສັ່ງຂອງ ພັກ-ລັດ ກ່ຽວກັບບັນຫາຢາເສບຕິດ ຢ່າງຕໍ່ເນື່ອງ ແລະ ເປັນປົກກະຕິ. ພວກເຮົາໄດ້ຊ່ວຍເຫລືອ ແລະ ສ້າງເງື່ອນໄຂ ໃຫ້ບັນດາຄອບຄົວ ປະຊາຊົນເຜົ່າຕ່າງໆ ຢູ່ເຂດພູດອຍທາງພາກເໜືອ ຫັນໄປປະກອບອາຊີບອື່ນທີ່ໝັ້ນຄົງ ແລະ ຖືກກົດໝາຍ ແທນການປູກຝິ່ນ, ໄດ້ດຳເນີນການບຳບັດປິ່ນປົວ ແລະ ຟື້ນຟູສຸຂະພາບ ຜູ້ຕິດຢາເສບຕິດ ເພື່ອໃຫ້ເຂົາເຈົ້າກັບຄືນເປັນຄົນດີ ຂອງສັງຄົມ.
ນອກຈາກນັ້ນ, ຍັງໄດ້ຕັ້ງໜ້າເຂົ້າຮ່ວມ ໃນການປະຕິບັດວຽກງານ 3 ສ້າງ ທີ່ຕິດພັນກັບການສ້າງບ້ານ ໃຫ້ເປັນຫົວໜ່ວຍພັດທະນາ ໂດຍໄດ້ສ້າງບ້ານ, ໂຮງຮຽນ, ກົມກອງ, ຫົວໜ່ວຍການຜະລິດ ແລະ ການບໍລິການ ທັງພາກລັດ ແລະ ເອກະຊົນ ຢູ່ຕາມທ້ອງຖິ່ນຕ່າງໆ ໃຫ້ປອດຈາກຢາເສບຕິດ. ພວກເຮົາໄດ້ເອົາໃຈໃສ່ ແລະ ໃຫ້ຄວາມສຳຄັນ ຕໍ່ການປະຕິບັດມາດຕະການ ທາງດ້ານກົດໝາຍ ຕໍ່ຜູ້ກະທຳຄວາມຜິດ ເຊິ່ງໃນປີນີ້ ເຈົ້າໜ້າທີ່ຕຳຫລວດ ໂດຍໄດ້ຮັບການຮ່ວມມື ຈາກພາກສ່ວນທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ, ໄດ້ມ້າງຄະດີ, ຢຶດຊັບສິນ, ສານເຄມີທີ່ນຳ ມາຜະລິດຢາເສບຕິດ, ພາຫະນະ, ທີ່ດິນ, ສິ່ງປຸກສ້າງ, ອາວຸດ, ວັດຖຸມີຄ່າ ແລະ ໂດຍສະເພາະ ໄດ້ຈັບກຸມຜູ້ກະທຳຜິດ ແລະ ກັກຕົວບັນດາຫົວໂປ່ຕົວການ ຄ້າຂາຍຢາເສບຕິດລາຍໃຫຍ່ ຈຳນວນໜຶ່ງ ມາດຳເນີນຄະດີ ຕາມກົດໝາຍ ແລະ ລະບຽບການ. ນອກຈາກນັ້ນ ກໍໄດ້ມີການພົວພັນ ຮ່ວມມືຢ່າງໃກ້ຊິດ, ເປັນເຈົ້າການ ແລະ ສະເໝີຕົ້ນສະເໝີປາຍ ກັບບັນດາປະເທດເພື່ອນມິດ ໂດຍສະເພາະ ກັບປະເທດບ້ານໃກ້ເຮືອນຄຽງ ແລະ ອົງການຈັດຕັ້ງສາກົນຕ່າງໆ ຕະຫລອດມາ.
ໃນໂອກາດນີ້, ຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ຂໍສະແດງຄວາມຍ້ອງຍໍຊົມເຊີຍ ເຈົ້າໜ້າທີ່ປ້ອງກັນຊາດ, ປ້ອງກັນຄວາມສະຫງົບ ແລະ ທຸກພາກສ່ວນກ່ຽວຂ້ອງ ຢູ່ຂັ້ນສູນກາງ ແລະ ທ້ອງຖິ່ນ ແລະ ປະຊາຊົນ ບັນດາຊັ້ນຄົນ ໃນທົ່ວປະເທດ ທີ່ໄດ້ຕັ້ງໜ້າເຂົ້າຮ່ວມ ໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ. ພ້ອມກັນນີ້ ກໍຂໍສະແດງຄວາມຂອບໃຈ ແລະ ຮູ້ບຸນຄຸນມາຍັງ ບັນດາປະເທດເພື່ອນມິດ, ອົງການຈັດຕັ້ງສາກົນ, ສະຖາບັນການເງິນສາກົນ, ອົງການບໍ່ສັງກັດ ລັດຖະບານ ແລະ ບັນດາຜູ້ປະກອບການ ທັງພາຍໃນ ແລະ ຕ່າງປະເທດ ທີ່ໄດ້ໃຫ້ການ ສະໜັບສະໜູນ, ອຸ້ມຊູຊ່ວຍເຫລືອ ໃຫ້ແກ່ລັດຖະບານ ແລະ ປະຊາຊົນລາວ ໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ຢ່າງໄດ້ຮັບຜົນດີ ຕະຫລອດມາ.
ໃນປັດຈຸບັນ, ການຜະລິດ ແລະ ການຄ້າຂາຍຢາເສບຕິດ ໄດ້ກາຍເປັນຂະບວນການ ຂ້າມຊາດທີ່ລັດຖະບານ ແລະ ປະຊາຊົນ ກໍຄືປະຊາຊາດທົ່ວໂລກ ພ້ອມກັນ ຕໍ່ຕ້ານຢ່າງແຂງແຮງ. ເຖິງວ່າຫລາຍປະເທດ ໄດ້ເພີ່ມທະວີ ມາດຕະການ ແລະ ຄວາມພະຍາຍາມ ໃນການສະກັດກັ້ນ, ປາບປາມ ແລະ ແກ້ໄຂບັນຫາດັ່ງກ່າວ ຢ່າງຕໍ່ເນື່ອງປານໃດກໍຕາມ, ແຕ່ການຜະລິດ, ການຊົມໃຊ້, ການຄ້າຂາຍ ແລະ ການລຳ ລຽງຂົນສົ່ງ ຢາເສບຕິດຢູ່ໃນໂລກ ກໍຄືຢູ່ ສປປ ລາວ ກໍຍັງບໍ່ຫລຸດໜ້ອຍຖອຍລົງ ແລະ ມີທ່າອ່ຽງຂະ ຫຍາຍຕົວຂຶ້ນ ຢ່າງໜ້າເປັນຫ່ວງ.
ດັ່ງນັ້ນ, ເພື່ອສະກັດກັ້ນ ແລະ ຕ້ານບໍ່ໃຫ້ບັນຫາ ຢາເສບຕິດ ຢູ່ປະເທດເຮົາ ໄດ້ຂະຫຍາຍອອກສູ່ວົງກວ້າງ ແລະ ເພີ່ມຄວາມຮຸນແຮງ ຂຶ້ນຕື່ມອີກນັ້ນ, ຂ້າພະເຈົ້າຂໍສະເໜີ ໃຫ້ບັນດາຂະແໜງການຕ່າງໆ ອ້ອມຂ້າງສູນກາງ, ຄະນະພັກ ແລະ ອົງການປົກຄອງທ້ອງຖິ່ນທຸກຂັ້ນ ແລະ ປະຊາຊົນທຸກຊັ້ນຄົນ, ທຸກເພດໄວ ໃນທົ່ວປະເທດ ຈົ່ງໄດ້ເອົາໃຈໃສ່ ບັນດາວຽກງານຕົ້ນຕໍຄື:
1. ໃຫ້ຖືເອົາການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ເປັນພັນທະ ແລະ ໜ້າທີ່ຂອງຄະນະພັກ, ອຳນາດການປົກຄອງ ແລະ ທຸກພາກສ່ວນທັງ ພາກລັດ ແລະ ເອກະຊົນ ຢູ່ຂັ້ນສູນກາງ ແລະ ທ້ອງຖິ່ນ ໂດຍໃຫ້ກຳນົດເອົາ ວຽກງານດັ່ງກ່າວ ເປັນວຽກຈຸດສຸມ ທີ່ຕິດພັນກັບວຽກງານ ກໍ່ສ້າງຮາກຖານການເມືອງ.
2. ໃຫ້ສືບຕໍ່ປັບປຸງກົງຈັກການຈັດຕັ້ງ ຂອງອົງການກວດກາ ແລະ ຄວບຄຸມຢາເສບຕິດ ຢູ່ຂັ້ນຕ່າງໆ ໃຫ້ແທດເໝາະກັບ ສະພາບການຕົວຈິງ ເພື່ອເຄື່ອນໄຫວວຽກງານ ໃຫ້ມີປະສິດທິຜົນ ແລະ ນັບມື້ນັບໄດ້ຮັບ ຜົນດີຂຶ້ນໄປເລື້ອຍໆ.
3. ໃຫ້ດຳເນີນການ ສຶກສາອົບຮົມ ແລະ ໂຄສະນາເຜີຍແຜ່ ດ້ວຍຫລາຍຮູບການ ເພື່ອປູດຈິດສຳນຶກ ໃຫ້ຄົນໃນທົ່ວສັງຄົມ ໂດຍສະເພາະແມ່ນ ຊາວໜຸ່ມ-ເຍົາວະຊົນ ເຫັນໄດ້ເຖິງພິດໄພ ແລະ ຜົນຮ້າຍ ຂອງຢາເສບຕິດ, ປຸກລະດົມໃຫ້ ເຂົາເຈົ້າຢູ່ຫ່າງໄກ ແລະ ບໍ່ໄປຫຍຸ້ງກ່ຽວກັບ ບັນຫາຢາເສບຕິດ, ໃຫ້ຕື່ນຕົວ ແລະ ສະໝັກໃຈເຂົ້າຮ່ວມ ໃນວຽກງານສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດຂອງ ພັກ-ລັດ ຢູ່ທ້ອງຖິ່ນຂອງໃຜລາວ.
4. ໃຫ້ສືບຕໍ່ຊຸກຍູ້ຊ່ວຍເຫລືອ ຄອບຄົວປະຊາຊົນ ຢູ່ຊົນນະບົດ ທີ່ໄດ້ຢຸດເຊົາ ປູກຝິ່ນ-ປູກກັນຊາ ແລ້ວ ເພື່ອໃຫ້ເຂົາເຈົ້າມີເງື່ອນໄຂ ຫັນໄປປະກອບອາຊີບອື່ນທີ່ໝັ້ນຄົງ ພ້ອມທັງສຶກສາອົບຮົມ ບໍ່ໃຫ້ເຂົາເຈົ້າກັບໄປລັກລອບ ປູກຝິ່ນ-ປູກກັນຊາ ຄືນໃໝ່ອີກ.
5. ໃຫ້ຕັ້ງໜ້າເອົາໃຈໃສ່ ຕໍ່ການບຳບັດປິ່ນປົວ, ຟື້ນຟູສຸຂະພາບ ແລະ ເຝິກວິຊາຊີບ ໃຫ້ແກ່ຜູ້ຕິດຢາເສບຕິດ ເພື່ອມີສຸຂະພາບ ທາງຮ່າງກາຍ ແລະ ຈິດໃຈທີ່ເຂັ້ມແຂງ, ບໍ່ຕົກເປັນທາດ ຂອງຢາເສບຕິດ ແລະ ກັບຄືນເປັນຄົນດີຂອງສັງຄົມ. ຢາກເຮັດວຽກງານນີ້ໄດ້ດີ ຕ້ອງໄດ້ປັບປຸງ ແລະ ຍົກລະດັບບັນດາສູນປິ່ນປົວທີ່ມີແລ້ວ ໃຫ້ມີຄຸນນະພາບ ດ້ວຍການຍົກລະດັບ ພະນັກງານ-ແພດໝໍ, ປະກອບພາຫະນະ-ອຸປະກອນ ແລະ ສະໜອງງົບປະມານ ທີ່ຈຳເປັນ ເພື່ອໃຫ້ບັນດາສູນປິ່ນປົວ ຜູ້ຕິດຢາເສບຕິດ ສາມາດປະຕິບັດ ພາລະບົດບາດຂອງຕົນ ຢ່າງມີປະສິດທິຜົນ ແລະ ນັບມື້ນັບດີຂຶ້ນໄປເລື້ອຍໆ.
6. ໃຫ້ຕັ້ງໜ້າສະກັດກັ້ນ ແລະ ປາບປາມພວກຄ້າຂາຍຢາເສບຕິດ ຢູ່ຕາມທ້ອງຖິ່ນຕ່າງໆ ຢ່າງເຂັ້ມ ງວດ ແລະ ເດັດຂາດ, ຊອກຮູ້ ແລະ ຕິດຕາມກວດກາ ບັນດາເປົ້າໝາຍນັບທັງ ຄົນລາວ ແລະ ຊາວຕ່າງປະເທດ ທີ່ລັກລອບເຄື່ອນໄຫວ ຈຳໜ່າຍຄ້າຂາຍ ແລະ ລຳລຽງຂົນສົ່ງເຂົ້າ-ອອກຢາເສບຕິດ ເພື່ອນຳເອົາເປົ້າໝາຍດັ່ງກ່າວ ມາດຳເນີນຄະດີຕາມກົດໝາຍ ແລະ ລະບຽບການຂອງບ້ານເມືອງ.
7. ໃຫ້ເພີ່ມທະວີ ແລະ ໃຫ້ຄວາມສຳຄັນ ຕໍ່ວຽກງານການພົວພັນ ຮ່ວມມືຢ່າງໃກ້ຊິດ ກັບສາກົນ ເປັນຕົ້ນ ກັບບັນດາປະເທດ ບ້ານໃກ້ເຮືອນຄຽງ ເພື່ອແລກປ່ຽນຂໍ້ມູນຂ່າວສານ ແລະ ຮ່ວມກັນສະກັດກັ້ນ, ຕັດຊ່ອງທາງ ແລະ ປາບປາມການຜະລິດ, ການລັກລອບຄ້າຂາຍ ແລະ ລຳລຽງຂົນສົ່ງ ຢາເສບຕິດ ແລະ ສານເຄມີຕົ້ນ ທີ່ນຳມາຜະລິດຢາເສບຕິດ ຢູ່ຕາມບໍລິເວນຊາຍແດນ ແລະ ບ່ອນທີ່ຖືກນຳໃຊ້ ເປັນແຫລ່ງຜະລິດ.
ຢາເສບຕິດເປັນບັນຫາ ຂອງຊາດ ແລະ ຂອງສາກົນ ທີ່ກຳລັງເປັນໄພຂົ່ມຂູ່ ຕໍ່ຄວາມສະຫງົບສຸກ, ຄວາມເປັນລະບຽບຮຽບຮ້ອຍ ຂອງສັງຄົມ ແລະ ຄວາມໝັ້ນຄົງ ຂອງຊາດລາວເຮົາ. ດັ່ງນັ້ນ ອີກເທື່ອໜຶ່ງ ຂ້າພະເຈົ້າ ຂໍຮຽກຮ້ອງມາຍັງ ພະນັກງານ, ທະຫານ, ຕຳຫລວດ ແລະ ປະຊາຊົນທຸກຊັ້ນຄົນ, ທຸກເພດໄວ ຈົ່ງໄດ້ພ້ອມກັນ ເປັນເຈົ້າການເຂົ້າຮ່ວມ ໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ໃຫ້ຫລຸດໜ້ອຍຖອຍລົງ ແລະ ໝົດໄປຈາກສັງຄົມລາວ. ຂ້າພະເຈົ້າ ຫວັງເປັນຢ່າງຍິ່ງວ່າ ບັນດາປະເທດເພື່ອນມິດ ແລະ ອົງການຈັດຕັ້ງສາກົນ ຈະສືບຕໍ່ໃຫ້ການ ສະໜັບສະໜູນ, ຮ່ວມມືຊ່ວຍເຫລືອດ້ານທຶນຮອນ, ບົດຮຽນ ແລະ ປະສົບການແກ່ລັດຖະບານ ແລະ ປະຊາຊົນລາວ ໃນການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ໃຫ້ໄດ້ຮັບຜົນດີ, ເຮັດໃຫ້ພາກພື້ນນີ້ຂອງໂລກ ໄດ້ປອດຢາເສບຕິດຕະຫລອດໄປ.
ທີ່ມາ: ຂປລ
© ໂຕະນໍ້າຊາ | tonamcha.com
___________
Post a Comment