ປກສ ເມືອງປາກທາຈັບກຸມຜູ້ຄ້າຢາເສບຕິດລາຍໃຫຍ່ ພ້ອມຂອງກາງຢາບ້າ 6 ກະເປົາໃຫຍ່

ອີງຕາມການລາຍງານຂ່າວຂອງ ປກສ ເມືອງປາກທາ ແຂວງບໍ່ແກ້ວ ວ່າ:  ວັນທີ 23 ກັນຍາ 2017 ຜ່ານມານີ້ເຈົ້າໜ້າທີ່ສະເພາະກິດກອງບັນຊາການ ປກສ ເມືອງປາກທາຈັບກຸມຜູ້ຖືກຫາພ້ອມຂອງກາງຢາບ້າ 6 ກະເປົາໃຫຍ່.

ທ່ານ ພັທ ແສງຄຳ ອິນທະນິນ ກຳມະການພັກເມືອງ ຫົວໜ້າກອງບັນຊາການ ປກສ ເມືອງປາກທາຖະແຫຼງການຕໍ່ການຈັບກຸມຢາເສບຕິດໃນຄັ້ງນີ້ວ່າ: ໃນວັນທີ 23 ກັນຍາ 2017 ໄດ້ມີແຫຼ່ງຂ່າວຈາກພົນລະເມືອງດີແຈ້ງວ່າ: ຈະມີການຂົນສົ່ງຢາເສບຕິດຜ່ານຈາກເມືອງປາກທາສູ່ເມືອງຫ້ວຍຊາຍ ສະນັ້ນ ກອງບັນຊາການຂອງພວກເຮົາຈຶ່ງໄດ້ແຕ່ງຕັ້ງເຈົ້າໜ້າທີ່ສະເພາະກິດອອກຕິດຕາມຫາເປົ້າໝາຍ ມາຮອດເວລາປະມານ 17 ໂມງ 30 ນາທີ ໄດ້ພົບເຫັນລົດກະບະວີໂກ້ແຊັມສີຂາວໝາຍເລກທະບຽນ ກຳແພງນະຄອນ ມດ 9992 ແລ່ນມຸ່ງໜ້າເຂົ້າສູ່ເມືອງຫ້ວຍຊາຍ, ຂ້ອນຂ້າງມີພິລຸດຜິດປົກກະຕິເຈົ້າໜ້າທີ່ຈຶ່ງໄດ້ສະແດງຕົວເຂົ້າກວດຄົ້ນລົດຄັນດັ່ງກ່າວ ເຊິ່ງຂັບຂີ່ໂດຍທ້າວ ເຢະປໍວ່າ ອາຍຸ 42 ປີ ອາຊີບຄ້າຂາຍ ແລະ ນາງ ໄມວາງວື ອາຍຸ 20 ປີ ທັງສອງອາໃສຢູ່ບ້ານຈອມຈຸກ ເມືອງຫ້ວຍຊາຍ ແຂວງບໍ່ແກ້ວ ຜ່ານການກວດຄົ້ນໄດ້ພົບເຫັນຢາເສບຕິດປະເພດຢາບ້າຈຳນວນ 6 ກະເປົາ, ຫຼື 96 ແພ໋ກ ເທົ່າກັບ 480 ມັດ ຊຸກຢູ່ໃນລົດ ເຈົ້າໜ້າທີ່ຈຶ່ງໄດ້ກັກຕົວທັງສອງພ້ອມດ້ວຍຂອງກາງ ເພື່ອສືບສວນສອບສວນຂະຫຍາຍຜົນຫາຄູ່ຮ່ວມຂະບວນການລາຍນີ້ມາດຳເນີນຄະດີຕາມລະບຽບກົດໝາຍ.

ທີ່ມາ: ປກສ ເມືອງປາກທາ ແຂວງບໍ່ແກ້ວ  

© ໂຕະນໍ້າຊາ | tonamcha.com     

___________