ກອງປະຊຸມສຳມະນາລະດົມຄວາມຄິດເຫັນຕໍ່ແຜນວຽກຕໍ່ໜ້າທີ່ຕິດພັນກັບໂຄງການປະຕິສັງຂອນພິພິທະພັນພະທາດຫຼວງ ເຊິ່ງຍັງເຫຼືອຄໍາ 9 ກິໂລ ໃນການປະຕິສັງຂອນພະທາດຫຼວງ.
ກອງປະຊຸມສຳມະນາລະດົມຄວາມຄິດເຫັນຕໍ່ແຜນວຽກຕໍ່ໜ້າ ທີ່ຕິດພັນກັບໂຄງການປະຕິສັງຂອນພິພິທະພັນພະທາດຫຼວງ ຄັ້ງທີ IV ໄດ້ຈັດຂຶ້ນວັນທີ 15 ກັນຍາ 2017 ຢູ່ຫໍທຳມະສະພາພະທາດຫຼວງ ໂດຍມີພະອາຈານ ເວດ ມະເສໃນ ຮອງປະທານສູນກາງອົງການພຸດທະສາສະໜາສຳພັນລາວ (ອພສ) ຮອງປະທານຄະນະຮັບຜິດຊອບລະດັບຊາດ ເພື່ອປະຕິສັງຂອນພິພິທະພັນພະທາດຫຼວງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງ ຮອງປະທານ ຄະນະກຳມະການປະຕິສັງຂອນ ທ່ານ ຄຳປະດິດ ເຂັມມານິດ ຫົວໜ້າພະແນກ ຖວທ ນວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂຄງການປະຕິສັງຂອນພິພິທະພັນພະທາດຫຼວງ ຄັ້ງທີ IV ປະກອບມີ 8 ກິດຈະກຳ ມູນຄ່າ 12,82 ຕື້ກວ່າກີບ ຜ່ານການລະດົມວັດຖຸປັດໄຈຈາກພາກສ່ວນຕ່າງໆໃນສັງຄົມ ສາມາດລະດົມຄຳໄດ້ 23 ກວ່າກິໂລ ແລະ ເງິນ 6 ຕື້ກວ່າກີບ ໄດ້ດຳເນີນການປະຕິສັງຂອນແຕ່ວັນທີ 4 ກັນຍາ 2016 ພາຍຫຼັງໄຂພິທີດຳເນີນໂຄງການແລ້ວ ກໍ່ໄດ້ອັງເຊີນຍອດຊໍ່ຄຳ 9 ກິໂລ 9 ບາດ ຂຶ້ນປະດິດສະຖານສູ່ຍອດພະທາດຫຼວງ ວັນທີ 31 ຕຸລາ 2016 ແລະ ວັນທີ 8 ເມສາ 2017 ໄດ້ມີພິທີຍົກຍອດຄຳຂຶ້ນປະດິດສະຖານສູ່ຍອດດວງປີພະທາດປາລະມີ 30 ທາດ ແລະ ພະທາດສີທຳມະຫາຍໂສກ ປັດຈຸບັນ ຄຳທີ່ໄດ້ຈາກການປະກອບສ່ວນຂອງພາກສ່ວນຕ່າງໆ ຍັງເຫຼືອ 9 ກິໂລ 28,4 ບາດ 3,8 ຫຸນ ແລະ 7,22 ກຼາມ ແຕ່ເງິນຍັງບໍ່ພໍ 6 ຕື້ກວ່າກີບ.
ທ່ານ ສີຫຸນ ສິດທິລືໄຊ ກ່າວວ່າ: ເພື່ອເຮັດໃຫ້ການກະກຽມດຳເນີນແຜນການສະເຫຼີມສະຫຼອງ ຜົນສຳເລັດໂຄງການປະຕິສັງຂອນພິພິທະພັນພະທາດຫຼວງ ຄັ້ງທີ IV ປະສົບຜົນສຳເລັດ ແລະ ເປັນເອກະພາບ ຮຽກຮ້ອງມາຍັງຜູ້ເຂົ້າຮ່ວມສຳມະນາຄັ້ງນີ້ ປະກອບຄຳຄິດເຫັນຊ່ວຍຕໍ່ຄຳທີ່ຍັງເຫຼືອ ວ່າຈະຫຼໍ່ເປັນພະພຸດທະຮູບຄຳ ເພື່ອຮັກສາໄວ້ເປັນມໍລະດົກຢູ່ຄູ່ກັບພະທາດຫຼວງ ຫຼື ຈະສືບຕໍ່ເອົາຂຶ້ນໂອບຈອມພະທາດ ໃນຖ້ານຖັດລົງມາ ສະເໜີແນວຄວາມຄິດກ່ຽວກັບການສ້າງຖ້ານອັດທະຈັນສຳລັບນັ່ງຊົມ ພິທີແຮ່ຜາສາດເຜິ້ງ ສ້າງຫ້ອງນ້ຳສະອາດເພື່ອຮັບໃຊ້ຜູ້ແທນ ກໍ່ຄືນັກທ່ອງທ່ຽວ ແລະ ແຜນການຈັດພິທີສົມໂພດ ແລະ ການສະເຫຼີມສະຫຼອງຜົນສຳເລັດໂຄງການປະຕິສັງຂອນພິພິທະພັນພະທາດຫຼວງ ຄັ້ງທີ IV ໄປພ້ອມໆກັບການຈັດພິທີປະກາດປີທ່ອງທ່ຽວລາວ 2018.
ທີ່ມາ: ວຽງຈັນໃຫມ່
© ໂຕະນໍ້າຊາ | tonamcha.com
Post a Comment