ຈີນມີມູນຄ່າ ການລົງທຶນໃນລາວ ຫລາຍກວ່າ6 ຕື້ໂດລາສະຫະລັດ
ໃນວັນທີ 15 ສິງຫາ 2017 ນີ້, ທີ່ໂຮງແຮມດອນຈັນພາເລດ ກະຊວງແຜນການ ແລະ ການລົງທຶນ ຮ່ວມກັບຄະນະ ພັດທະນາເສດຖະກິດທົ່ວໂລກ ໃນຂອບໜຶ່ງແລວທາງ ໜຶ່ງເສັ້ນທາງ ໄດ້ຈັດກອງປະຊຸມເວທີສົນທະນາ ແນະນຳນະໂຍບາຍ ແລະ ສະພາບແວດລ້ອມ ການລົງທຶນໃນ ສປປ ລາວ ໂດຍການເຂົ້າຮ່ວມຂອງ ທ່ານ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ຫວງ ທຽນ ຫາວ ປະທານຄະນະສົ່ງເສີມ ໜຶ່ງແລວທາງໜຶ່ງເສັ້ນທາງ ປະຈຳ ສປປ ລາວ, ມີຜູ້ຕາງໜ້າ ລັດຖະບານແຂວງເສສວນ ສປ ຈີນ ພ້ອມດ້ວຍຄະນະ ນັກທຸລະກິດຈີນ ແລະ ພາກສ່ວນກ່ຽວຂ້ອງເຂົ້າຮ່ວມ. ກອງປະຊຸມດັ່ງກ່າວ, ແມ່ນເພື່ອພົບປະແລກປ່ຽນ ຂໍ້ມູນກັນລະຫວ່າງ ລາວ-ຈີນ ພ້ອມທັງສ້າງເງື່ອນໄຂອັນດີ ໃຫ້ສອງປະເທດ ໄດ້ມີການຕິດຕໍ່ພົວພັນ ທຸລະກິດດ້ານການຄ້າ, ການລົງທຶນ ແລະ ແລກປ່ຽນບົດຮຽນ ທາງທຸລະກິດນຳກັນໃນຕໍ່ໜ້າ ໃນແນວຄວາມຄິດ “ໜຶ່ງເສັ້ນທາງໜຶ່ງເລວທາງ”.
ໃນໂອກາດດັ່ງກ່າວ, ທ່ານ ຄຳລຽນ ພົນເສນາ ກ່າວວ່າ: ໃນຍຸກສະໄໝ ແຫ່ງການເຊື່ອມໂຍງສາ ກົນນີ້ ການຮ່ວມມືກັບພາຍນອກ ແມ່ນມີຄວາມສຳຄັນຫລາຍ ຕໍ່ການພັດທະນາ ເສດຖະກິດ-ສັງຄົມ ຂອງປະເທດ ຊຶ່ງ ສປປ ລາວ ໃຫ້ຄວາມສຳຄັນ ແລະ ມີນະໂຍບາຍເປີດກວ້າງ ຕໍ່ການຮ່ວມມື ກັບບັນດາປະເທດຕ່າງໆ ໂດຍສະເພາະ ກັບ ສປ ຈີນ ໃນຮູບແບບສອງຝ່າຍ ແລະ ຫລາຍຝ່າຍ ໂດຍຜ່ານເວທີຕ່າງໆຂອງພາກພື້ນ ແລະ ສາກົນ. ນັບແຕ່ສັນຍາການເປີດກວ້າງ, ສົ່ງເສີມ ແລະ ປົກປ້ອງການລົງທຶນ ລະຫວ່າງ ລາວ-ຈີນ ທີ່ໄດ້ລົງນາມໃນ ປີ 1993 ເປັນຕົ້ນມາ ການລົງທືນຈາກ ສປ ຈີນ ກໍເພີ່ມຂຶ້ນຢ່າງຕໍ່ເນື່ອງ ໄດ້ມີມູນຄ່າການລົງທຶນທັງໝົດ 6,6 ຕື້ໂດລາສະຫະລັດ, ການລົງທຶນຂອງ ສປ ຈີນ ແມ່ນຢູ່ໃນອັນດັບ 1 ຈາກ 53 ປະເທດ ທີ່ມາລົງທຶນຢູ່ ສປປ ລາວ. ເຊິ່ງການລົງທຶນສ່ວນໃຫຍ່ແມ່ນ ນອນໃນຂະແໜງບໍ່ແຮ, ໄຟຟ້າ, ກະສິກຳ, ອຸດສາຫະກໍາ, ຫັດຖະກຳ ແລະ ການບໍລິການ.
ພ້ອມນີ້, ທ່ານ ຄຳລຽນ ພົນເສນາ ຍັງໃຫ້ຮູ້ຕື່ມວ່າ: ການຮ່ວມມືທີ່ເປັນມູນເຊື້ອ ກໍຄື ການສົ່ງເສີມການລົງທຶນ, ການພົວພັນໄປມາຫາສູ່ກັນ ຂອງປະຊາຊົນສອງປະເທດ ໄດ້ປະກອບສ່ວນ ໃນການພັດທະນາ, ແກ້ໄຂຄວາມທຸກຍາກ ຂອງປະຊາຊົນລາວ ແລະ ເປັນພື້ນຖານໃນການປະຕິບັດ ວິໄສທັດຮອດປີ 2030, ຍຸດທະສາດຮອດປີ 2025 ແລະ ການພັດທະນາ ເສດຖະກິດ-ສັງຄົມ 5 ປີ.
ຂ່າວ: ສົມຫວັງ ພາບ: ສະຫວາດ
© ໂຕະນໍ້າຊາ | tonamcha.com
___________
Post a Comment