ຮອງປະທານປະເທດ ເນັ້ນໃຫ້ຂະແໜງຍຸດຕິທຳ ປະຕິບັດກົດໝາຍຕ້ອງໃຫ້ມີຄວາມສັກສິດ ເຂັ້ມງວດ ຮັບປະກັນຄວາມຍຸດຕິທຳ
ກອງປະຊຸມວຽກງານຍຸດຕິທຳທົ່ວປະເທດ ປະຈຳປີ 2018 ແລະ ທິດທາງແຜນການປີ 2019 ດຳເນີນມາເປັນເວລາ 2 ວັນ ຈັດທີ່ສູນການຮ່ວມມືສາກົນ ແລະ ເຝີກອົບຮົມ (ICTC) ນະຄອນຫຼວງວຽງຈັນ ໂດຍເປັນປະທານຂອງທ່ານ ໄຊສີ ສັນຕິວົງ ລັດຖະມົນຕີກະຊວງຍຸດຕິທຳ ຮອດວັນທີ 29 ມັງກອນ 2019 ໄດ້ສຳເລັດ ໃຫ້ກຽດໂອ້ລົມຊີ້ທິດເຍືອງທາງ ໃນການຈັດຕັ້ງປະຕິບັດວຽກງານຂະແໜງຍຸດຕິທຳ ໃນປີຕໍ່ໜ້າ ໃຫ້ມີຜົນສຳເລັດ ໂດຍທ່ານ ພັນຄຳ ວິພາວັນ ຮອງປະທານປະເທດ.
ການໂອ້ລົມຄັ້ງນີ້ ທ່ານຮອງປະທານປະເທດ ໄດ້ເນັ້ນໃຫ້ຂະແໜງການຍຸດຕິທຳເອົາໃຈໃສ່ 7 ບັນຫາຫຼັກ ເພື່ອປັບປຸງວຽກງານຍຸດຕິທຳ ໃຫ້ມີຄວາມໜັກແໜ້ນເຂັ້ມແຂງ ແລະ ຕອບສະໜອງໄດ້ຄວາມຮຽກຮ້ອງຕ້ອງການໄລຍະໃໝ່ຂອງພັກ-ລັດຖະບານ ກໍຄື ສະພາບການພັດທະນາເສດຖະກິດ-ສັງຄົມໃນປັດຈຸບັນ ໂດຍໃຫ້ຂະແໜງຍຸດຕິທຳທັງຢູ່ສູນກາງ ແລະ ທ້ອງຖິ່ນກຳແໜ້ນຖານະບົດບາດຂອງຂະແໜງຍຸດຕິທຳ ອັນນີ້ແມ່ນຄວາມໝາຍສຳຄັນຍິ່ງຕໍ່ການກໍ່ສ້າງ ແລະ ຂະຫຍາຍລະບອບປະຊາທິປະໄຕປະຊົນ ສ້າງປະຖົມປັດໄຈກ້າວສູ່ສັງຄົມນິຍົມ ແລະ ເສີມຂະຫຍາຍລະບອບປະຊາທິປະໄຕປະຊາຊົນ ຕາມຈຸດໝາຍສັງຄົມນິຍົມ ເຮັດໃຫ້ປະຊາຊົນຮັ່ງມີຜາສຸກ ປະເທດຊາດມັ່ງຄັ່ງເຂັ້ມແຂງ ສັງຄົມມີຄວາມປອງດອງ ມີປະຊາທິປະໄຕຍຸດຕິທຳ ແລະ ສີວິໄລ ສ້າງ ແລະ ປັບປຸງກົດໝາຍ ຕ້ອງຮັບປະກັນລັກສະນະຊົນຊັ້ນ ແລະ ໃຫ້ຄົບຖ້ວນສົມບູນເປັນກ້າວໆ
ປະຕິບັດກົດໝາຍຕ້ອງໃຫ້ມີຄວາມສັກສິດ ເຂັ້ມງວດ ຮັບປະກັນຄວາມຍຸດຕິທຳ ດ້ານນີ້ເປັນສິ່ງທີ່ສັງຄົມ ແລະ ປະຊາຊົນເປັນຫວ່ງເປັນໄຍ ແລະ ເລັ່ງທວງໃຫ້ການນຳພາຂອງພັກ ແລະ ການຄຸ້ມຄອງຂອງລັດເຮົາ ຈັດຕັ້ງປະຕິບັດໃຫ້ດີກວ່າເກົ່າເອົາໃຈໃສ່ ຕິດຕາມກວດກາຂະຫຍາຍການຈັດຕັ້ງປະຕິບັດກົດໝາຍຢູ່ບ້ານ ມີຄວາມຈຳເປັນຕ້ອງໄດ້ເພີ່ມທະວີໃຫ້ສູງຂຶ້ນກວ່າເກົ່າ ຍົກສູງຄຸນນະພາບຂອງວຽກງານພັດທະນາບຸຄະລາກອນກົດໝາຍ ເພື່ອຕອບສະໜອງໃຫ້ແກ່ການຄຸ້ມຄອງລັດ ຄຸ້ມຄອງເສດຖະກິດ-ສັງຄົມດ້ວຍກົດໝາຍ ເປັນເຈົ້າການຊີ້ນຳ-ນຳພາຂອງຄະນະພັກ ແຕ່ລະຂັ້ນຕໍ່ວຽກງານຍຸດຕິທຳເປັນວຽກງານໜຶ່ງ ທີ່ຕ້ອງໄດ້ເພີ່ມທະວີການຊີ້ນຳ-ນຳພາຢ່າງໃກ້ຊິດຕິດແທດ ແລະ ເບິ່ງແຍງດູແລຂອງຄະນະພັກທຸກຂັ້ນ ຕໍ່ວຽກງານຍຸດຕິທຳ ເປັນຕົ້ນ ທັງນີ້ ກໍເພື່ອເຮັດໃຫ້ການຈັດຕັ້ງປະຕິບັດວຽກງານວິຊາສະເພາະຂອງການນຳ ຕະຫຼອດຮອດພະນັກງານວິຊາການເຮັດສຳເລັດໜ້າທີ່ທີ່ພັກ-ລັດ ແລະ ປະຊາຊົນມອບໝາຍໃຫ້ ເປັນຕົ້ນ ກໍແມ່ນການຕັດສິນຄະດີຕ່າງໆ ໃຫ້ໄປຕາມຂະບວນຍຸດຕິທຳ ແລະ ມີຄວາມໂປ່ງໃສ.
ພາບ ແລະ ຂ່າວ : ນສພ ວຽງຈັນໃຫ່ມ
© ໂຕະນໍ້າຊາ | tonamcha.com
___________
Post a Comment