ລົງນາມສັນຍາ ຂຸດຄົ້ນ-ສຳຫຼວດແຮ່ຄຳ ຢູ່ເມືອງຊານໄຊ ແລະ ເມືອງດາກຈຶງ
ພິທີລົງນາມສັນຍາວ່າດ້ວຍການຊອກຄົ້ນ-ສຳຫຼວດແຮ່ຄຳ ຢູ່ເຂດວັງຕັດ ເມືອງຊານໄຊ ແຂວງອັດຕະປື ແລະ ເຂດເມືອງດາກຈຶງ ແຂວງເຊກອງ ແລະ ພິທີລົງນາມບົດບັນທຶກວ່າດ້ວຍການກຳນົດເຂດຂຸດຄົ້ນ ແລະ ການແບ່ງປັນຜົນປະໂຫຍດໂຄງການຂຸດຄົ້ນ ແລະ ປຸງແຕ່ງແຮ່ຄຳຢູ່ເຂດວັງຕັດ ເມືອງຊານໄຊ ແຂວງອັດຕະປື ຈັດຂຶ້ນວັນທີ 22 ເມສາ 2019 ຢູ່ນະຄອນຫຼວງວຽງຈັນ ລະຫວ່າງທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ພົງໄຊໄຊຊະນະ ໄຊຍະເສນາ ຜູ້ອຳນວຍການໃຫຍ່ ບໍລິສັດ ວັງຕັດຂຸດຄົ້ນບໍ່ແຮ່ ຈຳກັດ ປະທານບໍລິສັດ ດາກຈຶງສຳຫຼວດແຮ່ທາດ ຈຳກັດ ແລະ ບໍລິສັດ ວັງຕັດສຳຫຼວດແຮ່ທາດ ຈຳກັດ ໂດຍມີບັນດາຮອງລັດຖະມົນຕີ ຮອງເຈົ້າແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພົງໄຊໄຊຊະນະ ໄຊຍະເສນາ ກ່າວວ່າ: ບໍລິສັດ ວັງຕັດຂຸດຄົ້ນບໍ່ແຮ່ ຈຳກັດ ແມ່ນຫົວໜ່ວຍທຸລະກິດເອກະຊົນທີ່ຈົດທະບຽນຢູ່ ສປປ ລາວ ພາຍໃຕ້ການຮ່ວມທຶນນັກທຸລະກິດພາຍໃນ ແລະ ຕ່າງປະເທດ ເຊິ່ງໄດ້ລົງທຶນ ແລະ ຈັດຕັ້ງດຳເນີນໂຄງການພັດທະນາບໍ່ແຮ່ໃນເຂດເມືອງດາກຈຶງ ແຂວງເຊກອງ ແລະ ເມືອງຊານໄຊ ແຂວງອັດຕະປື ແຕ່ປີ 2009 ເປັນຕົ້ນມາ ພາຍໃຕ້ສັນຍາສຳປະທານຊອກຄົ້ນ-ສຳຫຼວດ-ຂຸດຄົ້ນ-ຜະລິດປຸງແຕ່ງແຮ່ຄຳ ກັບຄະນະຮັບຜິດຊອບກອງທຶນພັກ ແລະ ປ້ອງກັນຊາດ-ປ້ອງກັນຄວາມສະຫງົບ ຫ້ອງວ່າການສູນກາງພັກ ໃນເມືອກ່ອນ ປັດຈຸບັນໄດ້ຮັບຜິດຊອບເຂດສຳຫຼວດແຮ່ຄຳຢູ່ເມືອງດາກຈຶງ ເນື້ອທີ່ 161,8 ກິໂລຕາແມັດ ແລະ ເຂດວັງຕັດ ເມືອງຊານໄຊ ເນື້ອທີ່ 219,3 ກິໂລຕາແມັດ ເຂດສຶກສາຄວາມເປັນໄປໄດ້ດ້ານເສດຖະກິດ-ເຕັກນິກ 15 ກິໂລຕາແມັດ ຢູ່ບ້ານວັງຕັດໃຫຍ່ ເມືອງດາກຈຶງ ແລະ ເຂດຂຸດຄົ້ນແຮ່ຄຳ 3 ກິໂລຕາແມັດ ຢູ່ບ້ານຢຽງດາກ (ບ້ານນ້ຳຄຳ) ເມືອງຊານໄຊ.
ສົກປີ 2017-2018 ກົມການເມືອງສູນກາງພັກ ໄດ້ມີມະຕິຕົກລົງຫັນວຽກງານການຄຸ້ມຄອງໂຄງການສ້າງກອງທຶນພັກ ໃຫ້ມາຂຶ້ນກັບລັດຖະບານ ຕາມທິດຫັນວຽກງານການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ ການລົງນາມສັນຍາຄັ້ງນີ້ເປັນບາດກ້າວໜຶ່ງ ໃນການຈັດຕັ້ງປະຕິບັດຂອງກົມການເມືອງສູນກາງພັກ ດ້ວຍການເຂົ້າສັນຍາໃໝ່ ພາຍໃຕ້ເງື່ອນໄຂ ລະບຽບຫຼັກການໃໝ່ ເພື່ອໃຫ້ສອດຄ່ອງກັບກົດໝາຍວ່າດ້ວຍແຮ່ທາດ ສະບັບປັບປຸງໃໝ່ ພາລະກິດ ແລະ ວິໄສທັດຂອງບໍລິສັດ ວັງຕັດຂຸດຄົ້ນບໍ່ແຮ່ ຈຳກັດ ນອກຈາກຮັບ ປະກັນການລົງທຶນຢ່າງມີປະສິດທິຜົນແລ້ວ ຍັງໄດ້ວາງຍຸດທະສາດການພັດທະນາບໍ່ແຮ່ຢ່າງມີຈຸດສຸມ ເພື່ອກ້າວຂຶ້ນເປັນອຸດສາຫະກຳທັນສະໄໝ ຕາມທິດສີຂຽວ ແລະ ຍືນຍົງ ຕິດພັນກັບວຽກງານ 3 ສ້າງ ການພັດທະນາຊົນນະບົດຮອບດ້ານ ປະກອບສ່ວນປະຕິບັດພັນທະສ້າງແຫຼ່ງລາຍຮັບເຂົ້າງົບປະມານແຫ່ງລັດ ຮັບປະກັນວຽກງານປ້ອງກັນຊາດ-ປ້ອງກັນຄວາມສະຫງົບລຽບຕາມຊາຍແດນ ນຳເອົາຄວາມຈະເລີນຮຸ່ງເຮືອງມາສູ່ມາຕຸພູມດິນແດນວີລະຊົນເມືອງດາກຈຶງ ແລະ ເມືອງຊານໄຊ. ພາບ-ຂ່າວ: ນສພ ວຽງຈັນໃຫ່ມ
___________
Post a Comment